თითქმის ერთი თვეა აღმოსავლეთ პარტნიორობის ევროპული სკოლა თბილისში გაიხსნა, სადაც ევროკავშირის დაფინანსებით, 30 მეთერთმეტე კლასელი სწავლობს. მათგან ათი ქართველია, რომელთა შორის არიან ბავშვები საქართველოს რეგიონებიდან, მათ შორის ქარელიდან და ჩოხატაურიდან. ისინი კონკურსის შედეგად შეარჩიეს.

"მოსწავლეებმა რეგიონებიდან გაგვაოცეს თავიანთი შედეგებით, მიუხედავად იმისა, რომ მანამდე საჯარო სკოლებში სწავლობდნენ. ამ სკოლით გვინდოდა, იმ ბავშვებისთვის მიგვეცა შესაძლებლობა, ვისაც დიდი ხარჯებიდან გამომდინარე, არ ექნებოდათ ამ პროგრამაზე სწავლის საშუალება", — აღნიშნავს პროექტის მენეჯერი ევროკავშირის წარმომადგენლობიდან, ნინო სამველიძე და დამატებით განმარტავს, რომ დამამთავრებელი კლასების ორი წელი ინტენსიური იქნება:

"ზოგს ფიზიკურადაც არ შეუძლია ამის დაძლევა. აქ მოხვედრა არის კარგი, მაგრამ აქ მოხვედრისთვის მზად უნდა იყვნენ ბავშვები".

კონკურსში მონაწილეობის მიღება შეეძლო ყველას, ვინც 16 ან 17 წლის იყო, ჰქონდა სასკოლო ქულების კონკრეტული ნიშნული (GPA) და ინგლისური ენა იცოდნენ B2 დონეზე. ორი წლის განმავლობაში ისინი დაესწრებიან გაკვეთილებს მულტიკულტურულ გარემოში, ევროპული ქვეყნების გამოცდილებაზე დაყრდნობით შეისწავლიან, მეცნიერებას, ფიზიკას, მათემატიკას, ბიოლოგიას, ქიმიასა და ეკონომიკას.

აღმოსავლეთ პარტნიორების მოქალაქეებისთვის გამოყოფილი 30 სტიპენდია, როგორც 2-წლიან IB (International Baccalaureate, IB) პროგრამაზე სწავლის გადასახადს, მათ საცხოვრებელსა, კვებას მოიცავს.

"უნივერსიტეტს, სადაც IB დიპლომის მფლობელი აბარებს, არ უჩნდება კითხვა, არ ითხოვს დამატებით ტესტების ჩაბარებას იმისთვის, რომ დარწმუნდეს აპლიკანტის კვალიფიკაციაში", — ამბობს ნინო სამველიძე. მისივე თქმით, ეს არის პირველი სკოლა, რომელიც დაფუძნებულია ევროკავშირის სასკოლო სისტემაზე და რომელიც გაიხსნა ევროკავშირის ფარგლებს გარეთ, ევროპული ფასეულობების გასავრცელებლად.

2017 წლის ნოემბერში ევროკავშირის აღმოსავლეთ პარტნიორობის სამიტზე წევრმა ქვეყნებმა, ისევე როგორც აღმოსავლეთ პარტნიორობის ექვსმა ქვეყანამ, ერთ-ერთ მთავარ პრიორიტეტად დაამტკიცა ევროპული სკოლის გახსნა. სკოლა 2020 წლისთვის მისაღები 20 შედეგიდან ერთ-ერთია.

"ამ იდეას აქვს უფრო დიდი პოლიტიკური დატვირთვა, რადგან ხელს უწყობს ადამიანური კაპიტალის განვითარებას რეგიონში, ისევე როგორც ჩვენი და დანარჩენი ხუთი ქვეყნის დაახლოების პროცესს ევროკავშირთან".

სკოლაში მომდევნო წელსაც 30 მოსწავლეს მიიღებენ. მათთვის საბუთების მიღება 2019 წლის იანვარ-თებერვალში დაიწყება.

აღმოსავლეთ პარტნიორობის სკოლა საქართველოში ევროპული სამეზობლო პოლიტიკისა და გაფართოების მოლაპარაკებების საკითხებში ევროკომისარის იოჰანეს ჰანის ინიციატივით გაიხსნა. იგი პირველ ეტაპზე, კერძო სკოლის – "ახალი სკოლა" ბაზაზე იმუშავებს.