სახელმწიფომ რთველისთვის 2017 წლის მსგავსად წელსაც 40 მილიონი ლარი გამოყო. გარემოს დაცვისა და სოფლის მეურნეობის სამინისტროს დაქვემდებარებულმა კომპანია სს აკურამ სექტემბრის დასაწყისში რთველისთვის 10 მილიონის მომსახურების შემდეგ დამატებით 30 მილიონის მომსახურების შეძენის ნებართვა ითხოვა. მოთხოვნა შესყიდვების სააგენტომ უკვე დააკმაყოფილა. კომპანიას 2018 წლის რთველისთვის აუცილებელი ღონისძიებების ჩატარება ევალება.

40 მილიონი ლარის მომსახურების შეძენაზე ნებართვის მიღებამდე სოფლის მეურნეობის მინისტრმა, ლევან დავითაშვილმა განაცხადა, რომ წელს სახელმწიფო ყურძნის "სუბსიდირებიდან სრულად გამოდიოდა."

როგორც მინისტრმა, ლევან დავითაშვილმა განაცხადა, წლევანდელი რთველი უნდა გახდეს პირველი ბოლო ათი წლის განმავლობაში, როდესაც სახელმწიფო სრულად გამოვა ყურძნის სუბსიდირების რეჟიმიდან.

On.ge დაინტერესდა, თუ რატომ გამოიყო რთველისთვის 2018 წელს წინა წლის მსგავსი თანხა, როდესაც სახელმწიფო სუბსიდირებაზე უარს ამბობს. სამინისტროს პრესსამსახურმა On.ge-ს უთხრა, რომ შესყიდვის დოკუმენტი ზოგადი სახისაა და ამიტომაც ყურძნის შესყიდვის კომპონენტიც მითითებულია, თუმცა სახელმწიფო სუბსიდირებაზე უარს ამბობს. მისივე თქმით, ეს არის სარეზერვო თანხა, რომელიც შეიძლება კომპანიამ არც გამოიყენოს.

გარდა ამისა, On.ge დაინტერესდა ერთი თვის შემდეგ რატომ ითხოვა კომპანიამ დამატებით 30 მილიონი ლარის მომსახურების შესყიდვაზე ნებართვა. ღვინის ეროვნულმა სააგენტომ გვიპასუხა, რომ აკურამ, შესაძლოა, შედარებით დაბალხარისხიანი ყურძენი შეიძინოს, რომელიც კერძო კომპანიებმა არ აითვისეს.

გამარტივებული შესყიდვის ბოლო დოკუმენტში ნათქვამია, რომ მიმდინარე ეტაპზე ყურძნის მაღალი მოსავლიანობის გამო ღონისძიების ჩასატარებლად დამატებით 30 მილიონი ლარის, ჯამში კი 40 მილიონი ლარის ღირებულების საქონლისა და მომსახურების შესყიდვა სჭირდებათ. მომსახურებაში იგულისხმება კერძო კომპანიების შესყიდვის შემდეგ დარჩენილი ყურძნის შესყიდვა, გადამუშავება, დასაწყობება და შენახვა. აღნიშნული ღონისძიებების ჩატარდება კახეთსა და რაჭა-ლეჩხუმში იგეგმება.