დასავლეთ ჰოლივუდის ქალაქის საბჭოს გადაწყვეტილების თანახმად, ჰოლივუდის დიდების ხეივანში დონალდ ტრამპის ვარსკვლავი აღარ იქნება.

25 ივლისს ვარსკვლავი მაცხოვრებელმა წერაქვით დააზიანა, თუმცა ეს პირველი შემთხვევა არ ყოფილა.

ვარსკვლავი შეტევის ობიექტი 2016 წლის არჩევნებამდე ერთი თვით ადრეც გახდა. ინციდენტი იმ ვიდეოს გავრცელებას მოჰყვა, რომელშიც ტრამპი ქალებზე ვულგარულად საუბრობდა.

ტრამპის ვარსკვლავის გარშემო სხვადასხვა დროს აიგო კედელი, დაიხატა სვასტიკა. პრეზიდენტის მოწინააღმდეგეებმა ის გადაღებეს კიდეც, გასულ წელს კი სტიკერებით გააფორმეს, რომელზეც #IResist (მე ვეწინააღმდეგები) ეწერა.

ჰოლივუდის დიდების ხეივნის დირექტორი, ლერონ გაბლერი ყოველი ასეთი შემთხვევის შემდეგ ხელმძღვანელობდა ვარსკვლავის აღდგენის პროცესს. ბოლო ინციდენტის შემდეგ მან განაცხადა, რომ ხალხის გაბრაზება მისთვის გასაგებია, მაგრამ იმედი აქვს, რომ ტრამპით განაწყენებულები ბრაზს სხვა ფორმით გამოხატავენ.

"ჩვენი დემოკრატია კანონის პატივისცემაზეა დამოკიდებული. აქ ადამიანები განსხვავებულ აზრს არჩევნებით გამოხატავენ და არა საჯარო საკუთრების განადგურებით", - თქვა გაბლერმა.

ტრამპს ვარსკვლავი 2007 წელს, საკუთარი შოუს, The Apprentice-ის გამო გაუხსნეს.