გარემოს დაცვისა და სოფლის მეურნეობის სამინისტრო, მინისტრ ლევან დავითაშვილის განცხადებას ავრცელებს, სადაც ის ბიძინა ივანიშვილის დენდროლოგიურ პარკსა და სხვა პროექტების "სიკეთეებზე" საუბრობს. დავითაშვილი ბიძინა ივანიშვილის მიმართ ოპოზიციის კრიტიკას პასუხობს.

მანამდე, ბიძინა ივანიშვილმა საზოგადოებრივ მაუწყებელთან ინტერვიუში თქვა, რომ მას ოპოზიცია მეტად აფასებს ვიდრე საკუთარი გუნდი. ის ამბობს, რომ ოპოზიციისგან მისი დაცვა ადვილი არაა და სწორედ ამიტომ ვერ დაიცავს მისი გუნდი მას.

"სამწუხაროდ, ჩვენს სახელმწიფოს არ გააჩნია ფუფუნება მნიშვნელოვანი რესურსი გამოყოს ისეთი პროექტების განსახორციელებლად, როგორიცაა დენდროლოგიური პარკი, თანამედროვე საკონცერტო დარბაზი, უნიკალური სანაშენე მეურნეობა, აღდგენილი კულტურული მემკვიდრეობის ასობით ძეგლი. ბატონი ბიძინას მეცენატობით, ჩვენ გვაქვს ეს სიკეთეები", - ამბობს მინისტრი დავითაშვილი და აღნიშნავს, რომ ქართუ ფონდი მრავალ მილიონ ლარს ხარჯავს საგზაო-საკომუნიკაციო ინფრასტრუქტურის მოწყობაში, რათა ხეების გადატანა შეძლონ.

"ფაქტობრივად, ბუნების ახალი ძეგლი იქმნება. უბრალოდ აბსურდია იმაზე საუბარი, რომ ასეთი უნიკალური ტერიტორიის მოწყობა ნეგატიურ ზემოქმედებას ახდენდეს გარემოზე“, - ამბობს გარემოს დაცვის მინისტრი.

მინისტრი იხსენებს შეკვეთილში აშენებული საკონცერტო დარბაზის სახელმწიფოსთვის გადაცემის ფაქტს და "აბსურდს" უწოდებს იმას, თითქოს, ბიძინა ივანიშვილმა დარბაზი სახელმწიფოს შენახვის სიძვირის მიზეზით გადასცა.

ლევან დავითაშვილი თავის განცხადებაში ამბობს იმასაც, რომ ქართული ვაზის გენოფონდი ბატონმა ბიძინამ გადაარჩინა:

"ჩვენი მოსახლობის დიდმა ნაწილმა და, პრაქტიკულად, ყველა ფერმერმა კარგად იცის, რომ ჯიღაურას მეურნეობა აგრო ბიომრავალფეროვნების მთავარი ცენტრია. ჩვენ მოგვეცა საშუალება და გადაშენების პირას მყოფი ჯიშები გადავარჩინეთ. ჯიღაურას მეურნეობა ვაზისა და ღვინის საერთაშორისო ორგანიზაციის (OIV) მიერ მსოფლიოში საუკეთესო კოლექციად არის აღიარებული. დღეს ეს მეურნეობა, ეს უნიკალური საცავი სახელმწიფოს საკუთრებაა, საჩუქარია ბიძინა ივანიშვილისგან".

საზოგადოებრივ მაუწყებელთან ინტერვიუში, ბიძინა ივანიშვილმა თქვა, რომ ერთადერთი მინუსი რაც ხეების გადატანის პროცესს აქვს არის ის, რომ ბევრი ფული იხარჯება:

"ფულს ვხარჯავ ამ პარკში იმიტომ, რომ მხოლოდ საქართველოში და საზოგადოებაში რჩება, 10 -12 მილიონი ლარი მიიღო ხალხმა რომ ნაკვეთზე გავეკარებინე. ეს ფული რჩება მოსახლეობაში, რკინიგზას დიდი ფული აქვს მიღებული, რომ ჩახსნას და გადაიტანოს... არ ყოფილა მატარებლის მოძრაობს შეფერხების შემთხვევები და რუსთავი 2 ცრუობს".