აშშ-სა და რუსეთის პრეზიდენტების შეხვედრა შემოდგომაზე აღარ ჩატარდება და 2019 წლისთვის გადაინაცვლებს. დონალდ ტრამპის მრჩევლის, ჯონ ბოლტონის თქმით, შეხვედრის გადადება საპრეზიდენტო არჩევნებში კრემლის ჩარევასთან დაკავშირებულ გამოძიებას უკავშირდება.

"პრეზიდენტი მიიჩნევს, რომ პუტინთან შემდეგი ორმხირივი შეხვედრა უნდა გაიმართოს, როდესაც რუსეთის გამო ალქაჯებზე ნადირობა დასრულდება. ამიტომ ჩვენ გადავწყვიტეთ, რომ ეს მომავალ წელს იქნება", - განაცხადა ბოლტონმა.

20 ივლისს თეთრი სახლის პრესმდივანმა სარა სანდერსმა დატვიტა, რომ ტრამპმა პუტინი ვაშინგტონში შემოდგომაზე მიიწვია და მისი ორგანიზება ჯონ ბოლტონს დაავალა.

ბოლო შეხვედრა პრეზიდენტებს შორის ჰელსინკიში 16 ივლისს ჩატარდა. შეხვედრას დიდი კრიტიკა მოჰყვა ამერიკაში. ერთობლივ პრესკონფერენციამდე პუტინი და ტრამპი ერთმანეთს პირისპირ თარჯიმნების თანდასწრებით ესაუბრნენ. დღემდე უცნობია რაზე მიმდინარეობდა საუბარი ორ პრეზიდენტს შორის.

სკანდალი მოჰყვა პრესკონფერენციაზე არჩევნებში რუსეთის ჩარევის შესახებ დონალდ ტრამპის პასუხს: "პრეზიდენტი პუტინი ამბობს, რომ ეს არ იყო რუსეთი. მე ვერ ვხედავ, რატომ უნდა ყოფილიყო ის". ამერიკაში დაბრუნების შემდეგ კი მან აღიარა, რომ საუბრისას შეცდომა დაუშვა და რუსეთის ჩარევას არ გამორიცხავს.

გაიგეთ მეტი: