ადამიანები ისე მოგვაწყო კოსმოსმა, რომ ყოველთვის უკეთესობისკენ ვილტვით, გვინდა უკეთესი ცხოვრება, კომფორტი, ჯანმრთელობა, შემოსავალი და კიდევ ბევრი რამ, მაგრამ საინტერესოა, რას ვაკეთებთ ამის მისაღწევად? შეიძლება ითქვას, ბევრ რამეს, მაგრამ რაღაც ისე მაინც არ არის, როგორც ჩვენ გვინდა. წარუმატებლობისას ხშირად ვეკითხებით საკუთარ თავს, რა დავაკელით ამ საქმეს, არაფერი რომ არ გამოგვივიდაო. სინამდვილეში, მიზეზი შეიძლება ძალიან წვრილმან საკითხებში იყოს, ამიტომ მე გთავაზობთ შვიდ გზას იმისთვის, რომ თქვენი ცხოვრება უფრო ეფექტიანად წარმართოთ.

1. გაიღვიძეთ ჩვეულებრივზე 30 წუთით ადრე

ტუუუმ! ტუუუმ! - გეცნობათ ეს ბგერები? დიახ, სწორად მიხვდით, ეს მაღვიძარის სიგნალია, რომელიც ყოველ დილით ურცხვად გვაღვიძებს! მეც მძულს, მესმის თქვენი, მაგრამ რომ არა ის, ვინ იცის სად იქნებოდა კაცობრიობა. ხო, ვაზვიადებ, მაგრამ მაინც.

მაღვიძარა უნიკალური საშუალებაა იმისთვის, რომ თქვენი დღე ჩვეულებრივზე ოდნავ ადრე დაიწყოს. გამოიწვიეთ საკუთარი თავი და შეეჯიბრეთ მას, ვნახოთ ვინ აჯობებს. ამ გზით თქვენ საკუთარ თავთან ბრძოლას ისწავლით და გამოიმუშვებთ უნარს, რომ ხანდახან, საქმე, თქვენი სიზარმაცის საწინააღმდეგოდ, საჭიროებისამებრ აკეთოთ.

გარდა ამისა, ღამით უფრო ტკბილად დაგეძინებათ და ნელნელა, ნაბიჯ-ნაბიჯ მიეჩვევით ადრე გაღვიძებას.

2. შუადღეს მიმართეთ მედიტაციას და შესვენებაზე არ ჩასკდეთ

სულ ოცი წუთის საქმეა, მენდეთ! მედიტაცია არ გულისხმობს ძვირადღირებულ დასვენებებსა და მასაჟისტთან ყოველდღე სიარულს. თქვენ თავად შეგიძლიათ დაეხმაროთ საკუთარ თავს ენერგიის აღდგენაში. კარგია თუ დრო გექნებათ, რომ ცოტა ხნით წაუძინოთ ხოლმე, მაგრამ თუ არ გაქვთ, არც ესაა პრობლემა.

თქვენ შეგიძლიათ წყნარ ოთახში ჩამოჯდეთ, იქ სადაც ძალიან ცოტა ხალხი იქნება ან თუ საერთოდ არავინ იქნება, უკეთესია. მოუსმინეთ მუსიკას ცოტა ხნით და ღრმად ისუნთქეთ. ამ გზით თქვენ შეძლებთ ენერგიის აღდგენას და საქმეზე უფრო მეტად კონცენტრირებას. სხვა მედიტაციის საშუალებებისთვის მიმართ ძია ან გადმოწერეთ აპლიკაციაHeadSpaceAPP .

გარდა ამისა, ეცადეთ მსუბუქად წაიხემსოთ და ძალიან ბევრი არ ჭამოთ. მაძღარი ადამიანი, მძიმე ადამიანიაო, ნათქვამია (თუ არა?!).

3. ნუ გადაუხვევთ საკუთარ მიზანს. იქონიეთ მოთმინება

თუ ხართ დიეტაზე ან ჯანსაღი ცხოვრების წესი აირჩიეთ, მიჰყევით მიზანს ბოლომდე. „დღეს შევჭამ და ხვალიდან დავუბრუნდები“, „ერთი ნაჭერი რას მიზამს“ და მსგავსი წინადადებები დაივიწყეთ. თუ შედეგის მიღება გსურთ, აჯობეთ საკუთარ თავს და გაიმარჯვეთ მასზე. მერწმუნეთ, შედეგის ნახვის შემდეგ საოცრად კმაყოფილი იქნებით, რაც საკუთარი თავის რწმენას გაგიძლიერებთ!

4. ნუ ეძგერებით დიად მიზნებს, ნელ-ნელა მიდით მასთან

ყველაზე დიდი შეცდომა, რასაც ადამიანები უშვებენ, განდიდების მანიაა. ხშირად შეხვდებით ისეთი ადამიანების კატეგორიას, რომლებსაც პირველივე ნაბიჯზე დიდი აღიარების მოპოვება სურთ. სინამდვილეში, დიდი წარმატება პატარა წარმატებების მოპოვების ხარჯზე მოდის.

დაისახეთ მიზანი და იარეთ მისკენ სწორად, პატარ-პატარა ნაბიჯებით, რათა ისწავლოთ და მიიღოთ გამოცდილება. ამ შემთხვევაში, თქვენ მართლაც შეძლებთ იმ წარმატების მიღწევას, რომელზეც ოცნებობთ.

5. იფიქრეთ სიკვდილზე უფრო ხშირად, მართლა გეუბნებით.

სიკვდილი განსჯის ის საგანია, არავის რომ არ აგვცდება. როდის მოგვაკითხავს და მოგვცელავს, არავინ იცის. სწორედ ამიტომ, ხშირად იფიქრეთ იმ საბედისწერო დღეზე, როცა ამ ქვეყნად აღარ იქნებით. ეს დაგეხმარებათ მოტივირებაში, რომ შექმნათ რაიმე ისეთი, რაც თქვენი სიკვდილის მერეც იცოცხლებს. სიკვდილზე ფიქრი მუდამ შეგახსენებთ, რომ დრო მიდის და ამიტომ საჭიროა დროის სწორი ორგანიზება.

6. უკეთ შეარჩიეთ სიტყვები

სიტყვას უდიდესი ძალა აქვს. შესაძლოა გაუაზრებლად ისეთ ფრაზებს ისროდეთ, რომ ყოველდღიურად კარგავდეთ ადამიანების მოწონებასა და მხარდაჭერას. მაგალითად, ნაცვლად იმისა, რომ ვინმეს უთხრათ ''დაღლილი ჩანხარო'', ჰკითხეთ ''ყველაფერი რიგზეა? შემიძლია რამეში დაგეხმარო?''. ასეთი მიდგომით თქვენ ყოველთვის მეტ სიმპათიას დაიმსახურებთ.

7. შეიძინეთ ახალი მეგობრები

ახალი მეგობრების შეძენა აუცილებელია. თუ თქვენს სამეგობრო წრეს გააფართოებთ და ირგვლივ მეტი პოზიტიური და განათლებული ადამიანი გეყოლებათ, დიდი შანსია, რომ თქვენც ბევრს ისწავლით მათგან. ნებისმიერ შემთხვევაში, ახალი მეგობრების შეძენა პოზიტიური მოვლენაა.