საქალაქო სასამართლოს სასადილოს ინციდენტის საქმეზე ზვიად კუპრავას აღკვეთი ღონისძიების სახით ხუთი ათასლარიანი გირაო შეუფარდეს. ინფორმაცია ამის შესახებ On.ge-ს თბილისის საქალაქო სასამართლოს პრესსამსახურმა დაუდასტურა. პროკურატურა კუპრავას სასამართლოს უპატივცემულობას ედავებოდა.

"პოლიციის მუშაკთა არაერთი მოთხოვნის მიუხედავად ზვიად კუპრავამ უარი განაცხადა სხდომის დარბაზაში დაბრუნებაზე და დროის გაჭიანურების მიზნით სხვა პირის თეფშიდან განაგრძო საკვების მიღება", - წერია საბრალდებოს დასკვნის ამონარიდში.

საბრალდებო დასკვნის თანახმად, მიუხედავად იმისა, რომ 14-დან 15 საათამდე მოსამართლემ შესვენება გამოაცხადა, ზვიად კუპრავა არ გათავისუფლებულა დაკავებიდან, იგი გავიდა სხდომის დარბაზიდან და თვითნებურად ჩავიდა ამავე სასამართლოს ადმინისტრაციული შენობის სასადილოში.

11 ივნისს თბილისის საქალაქო სასამართლოს სასადილოში დაპირისპირება მოხდა. ზაზა სარალიძის თქმით, მას შემდეგ, რაც სასამართლო პროცესზე მოსამართლემ შესვენება გამოაცხადა, ის ზვიად კუპრავასთან ერთად სადილობდა. მოგვიანებით, მათთან სამართალდამცველები მივიდნენ და მოთხოვეს სასამართლო დარბაზში დაბრუნება. ვიდეოში, რომელიც რუსთავი 2-მა გაავრცელა, ჩანს რომ ზვიად კუპრავა ძალის გამოყენებით დააბრუნეს დარბაზში.