შინაგან საქმეთა სამინისტრო ზვიად კუპრავა სასამართლოს უპატივცემულობას ედავება. საქმის წარმოების დაწყების შესახებ ინფორმაცია შსს-ს პრესსამსახურმა გავრცელა.

საქმისწარმოება სისხლის სამართლის კოდექსის 366-ე მუხლით დაიწყო. ამ მუხლით, სასამართლოს უპატივცემულობისთვის ჯარიმა, საზოგადოებისთვის სასარგებლო შრომა ან/და ერთ წლამდე პატიმრობა ემუქრება.

საქმე ეხება 12 ივნისს მომხდარ ინციდენტს, როდესაც შესვენების დროს სასამართლოს სასადილოში მყოფი ზვიად კუპრავა ძალის გამოყენებით დააბრუნეს სხდომათა დარბაზში. მანდატურისა და პოლიციის თანამშრომლები კუპრავას განუმარტავდნენ, რომ ისინი მოსამართლის მოთხოვნას ასრულებდნენ.

შსს-ს ცნობით, მიმდინარეობს გამოძიება და ტარდება შესაბამისი საგამოძიებო მოქმედებები.