პრემიერ-მინისტრისა და საპარლამენტო უმრავლესობის სხდომა, მთავრობის სტრუქტურულ ცვლილებებთან დაკავშირებით დასრულდა. სხდომის დასრულების შემდეგ, საპარლამენტო უმრავლესობის ლიდერმა გია ვოლსკიმ განაცხადა, რომ ყველა საკითხზე ჩამოყალიბდნენ და შესაბამისად, ეს უმრავლესობისა და პრემიერის ბოლო შეხვედრა იყო.

"პრემიერმა წარმოადგინა თავისი და ჩაიწერა ჩვენი მოსაზრებები. მე ვფიქრობ, რომ მას უნდა მივცეთ საშუალება წარმოადგინოს ძირითადი შეჯამებული ვერსია", - განაცხადა ვოლსკიმ და აღნიშნა, რომ მედიაში გავრცელებული ინფორმაცია სავარაუდო სტრუქტურული ცვლილებების შესახებ სხდომაზე განიხილეს.

"დღეს მთავარი აქცენტები გაკეთებული იყო, თვითონ შედეგებზე, თუ რა ეფექტი ექნება როგორც ორგანიზაციული, ასევე ფინანსური თვალსაზრისით და რა მნიშვნელობა ექნება კიდევ მომავლისთვის, რომ სოციალურ პროგრამებს კიდევ უფრო მეტი დავახარჯოთ. ყველა დეტალზე უკვე შევთანხმდით", - ამბობს ვოლსკი.

საპარლამენტო უმრავლესობის წევრის თქმით, საბოლოო გადაწყვეტილებას პრემიერი შემდეგი კვირის დასაწყისში მიიღებს.

პრემიერ-მინისტრობის კანდიდატად წარდგენის შემდეგ, მამუკა ბახტაძემ განაცხადა, რომ პრიორიტეტი მცირე ზომის, მაგრამ ოპერატიული და მოქნილი მთავრობა იქნება.

19 ივნისს კომიტეტების გაერთიანებულ სხდომებზე მინისტრობისა და პრემიერ-მინისტრობის კანდიდატებს უსმენდნენ. 20 ივნისს კი კენჭისყრაზე პარლამენტმა მთავრობას დაუჭირა მხარი. ბახტაძემ განაცხადა, ამჟამინდელი მთავრობა ძველი შემადგენლობით არის დროებითი.