აქცია #ნუმომკლავ შეკვეთილში, ბიძინა ივანიშვილის სახლთანაც გაიმართა. ინფორმაციას ამის შესახებ ტელეკომპანია რუსთავი 2 ავრცელებს.

აქციის მონაწილეებმა ხორავას ქუჩაზე მოკლული დავით სარალიძის მამას - ზაზა სარალიძეს, სოლიდარობა გამოუცხადეს და ხელისუფლებას მოუწოდეს, მოზარდების მკვლელობა დროულად და ობიექტურად გამოიძიოს. ბიძინა ივანიშვილის სახლთან შეკრებილები აცხადებენ, რომ სისტემის მთავარი მმართველი ყოფილი პრემიერია.

აქცია #ნუმომკლავ თბილისში და სხვა ქალაქებში მესამე დღეა იმართება. საპროტესტო გამოსვლები მას შემდეგ დაიწყო, რაც თბილისის საქალაქო სასამართლოს გადაწყვეტილებით ხორავას ქუჩაზე მოკლული დავით სარალიძის მკვლელი ვერ დადგინდა. სასამართლო გადაწყვეტილებით დადასტურდა, რომ პროკურატურას სარალიძის მკვლელი არ ჰყავდა დაკავებული.