დღეს ირაკლი ალასანიამ თავისუფალი დემოკრატების ახალ აღმასრულებელ მდივნად თამარ კეკენაძე დანიშნა, რომელიც პარტიაში 2005 წლიდან არის გაწევრიანებული:

"თამარი კოორდინაციას გაუწევს პარტიის რეგიონალური, საქალაქო და რაიონული ორგანიზაციების საქმიანობას. თამარი გავიცანი, როდესაც თავდაცვის სამინისტროში მივედი. ის 2012-2015 წლებში გახლდათ თავდაცვის სამინისტროს მთავარი სამოქალაქო წარმომადგენელი ნატოსა და ევროკავშირში".

მისი თქმით, საჯარო სამსახურს მიღმა, კეკენაძეს ასევე აქვს ქართულ და საერთაშორისო ორგანიზაციებში მუშაობის დიდი გამოცდილება, გავლილი აქვს პრაქტიკა ევროპარლამენტის პრეზიდენტის პოტტერინგის კაბინეტში და ევროპის მასშტაბით წლების განმავლობაში მუშაობდა ახალგაზრდების ინტერესების დამცველად.

კეკენაძემ აღნიშნა, რომ თავდაცვის სამინისტროში 5 წელი მუშაობდა და ყველა იმ მნიშვლეოვანი და მტკივნეული რეფორმის განხორციელბა, რამაც საქართველოს ნატოსა და ევროკავშირში ინტეგრაციის პროცესი ახალ საფეხურზე გადაიყვანა, სწორედ ირაკლი ალასანიას მინისტრობის პერიოდში მოხდა:

"ამიტომ მივიღე თავისუფალ დემოკრატებში გაწევრიანების გადაწყვეტილება, ჩავთვალე რომ, ეს ის გუნდია, რომელთან ერთადაც საქართველოს უკეთესი მომავლის შექმნა რეალური და მართლაც განხორციელებადი იქნებოდა. რადგან პირველად მეძლევა ამ საკითხზე საუბრის შესაძლებლობა, მინდა ჩვენმა საზოგადოებამ იცოდეს, რომ სწორედ იმ 5 უდანაშაულო ადამიანის, მაღალი რანგის პროფესიონალების დამსახურებით შეძლო თავდაცვის სამინისტრომ და საქართველომ, თავდაცვის შესყიდვების სისტემის რეფორმირება, რაც ნატოში ინტეგრაციის პროცესის ერთ-ერთ მნიშვნელოვან პრობლემურ საკითხად ითვლებოდა წლების განმავლობაში".