ერთი კარგი ამბავი გვაქვს და ერთიც - ცუდი.

კარგი ამბავი ასეთია: თქვენ შეგიძლიათ იზრუნოთ თქვენი გულის დაბერების პროცესის შენელებაზე და გაზარდოთ იმის შანსი, რომ იცხოვროთ დიდხანს, ჯანმრთელად და ბედნიერად. ცუდი ამბავია, რომ ამისათვის მართლა უნდა ივარჯიშოთ და არა "ორშაბათიდან".

ფიზიოლოგიის ჟურნალში რამდენიმე თვის წინ გამოქვეყნებული კვლევა გვეუბნება, ზუსტად რამდენჯერ უნდა ვივარჯიშოთ იმისათვის, რომ არტერიების ჯანმრთელობა შევინარჩუნოთ და ინფარქტის რისკი შევამციროთ. იმ ადამიანების საშუალო ასაკი, რომელთაც გულის შეტევა ემართებათ, 65 წელია, თუმცა ადამიანების მცირე ნაწილს 45 წლამდეც ემართებათ გულის შეტევა. ახალი კვლევა გვიჩვენებს, რომ საფრთხეების მართვა შესაძლებელია.

ადამიანებს განსხვავებული ზომის არტერიები გვაქვს, ეს ფაქტორი კვლევაშიც გათვალისწინებულია და გვიჩვენებს, რომ უფრო მცირე ზომის არტერიების მქონე ადამიანებს კვირის განმავლობაში უფრო ცოტა ვარჯიში სჭირდებათ "ახალგაზრდობის შესანარჩუნებლად". საშუალო ზომის არტერიების მქონე ადამიანებისათვის კვირაში 2-3 ნახევარსაათიანი ვარჯიში საკმარისია არტერიული ელასტიურობის შესანარჩუნებლად. შესაბამისად, დიდი ზომის არტერიების მქონე ადამიანებმა ამავე მიზნის მისაღწევად კვირაში 4 ან 5 დღეც კი უნდა ივარჯიშონ.

ერთ-ერთი მკვლევარის აზრით, მომავალში შესაძლებელი იქნება ვარჯიშის კონკრეტული რეჟიმის განსაზღვრა, რომელიც რიგ შემთხვევაში გულს შეუნარჩუნებს ახალგაზრდობას, რიგ შემთხვევაში კი - დაბერებულ გულსა და არტერიებსაც კი "გააახალგაზრდავებს".

კვლევის შედეგები განსაკუთრებით მნიშვნელოვანია აშშ-ს მაცხოვრებელთათვის, სადაც ჭარბწონიანობა და მის შედეგად გამოწვეული გულ-სისხლძარღვთა პრობლემები ეპიდემიურ მასშტაბებს აღწევს. წელიწადის განმავლობაში აშშ-ში 610 000 ადამიანი კვდება გულის პრობლემების გამო, ეს წელიწადის განმავლობაში აშშ-ში მომხდარი სიკვდილების ჯამური რაოდენობის 25%-ია. ყოველ წელს 735 000 ამერიკელს მოსდის გულის შეტევა, ამ შემთხვევათა 28%-ში ეს დაზარალებულისათვის რიგით მეორე გულის შეტევაა.

მეცნიერებმა კვლევის განმავლობაში 60 წელს გადაცილებული პერიოდულად მოვარჯიშე 102 ადამიანის არტერიათა ელასტიურობა შეამოწმეს. ამის შემდეგ ისინი ვარჯიშის სიხშირის მიხედვით ოთხ ჯგუფში გადაანაწილეს და იპოვეს დამოკიდებულება ვარჯიშის სიხშირესა და არტერიულ ელასტიურობას შორის.

კვლევამ აჩვენა, რომ ხანგრძლივ ვარჯიშს შეუძლია გულის დაბერებით გამოწვეული ზიანის შემცირება. მომავალში მეცნიერები აპირებენ იმის შემოწმებას, თუ რამდენად შესაძლებელია ვარჯიშით სისხლის მიმოქცევის მთლიანი სისტემის დაბერების შენელება.