ქართული ოცნების დეპუტატი კობა ლურსმანაშვილი საზოგადოებას პარლამენტის პლენარულ სხდომაზე ჰომოფობიური ტერმინის გამოყენების გამო ბოდიშს უხდის, თუმცა მიაჩნია, რომ სიძულვილის ენას არასდროს იყენებს.

დეპუტატის თქმით, მისი განმარტების შინაარსობრივ ნაწილში არაფერს ცვლის და აცხადებს, რომ როგორც კანონმდებელი, არის უმცირესობების უფლებების დამცველი.

"მიმაჩნია, რომ ჩვენს ქვეყანაში უმცირესობის უფლებები დაცული უნდა იყოს. საზოგადოების ყველა წარმომადგენელს აქვს უფლება დაცული იყოს მისი უფლებები. შინაარსობრივად არაფერი იცვლება, მაგრამ თუ ვინმეს მიაჩნია, რომ არასწორი ტერმინი გამოვიყენე ბოდიშს მოვიხდი. შინაარსობრივად არაფერს ვცვლი. ეს ტერმინი ნიშნავს ბიჭის სიყვარულს და თუ ვინმეს პრობლემა აქვს, ერთადერთი საზოგადოებას შემიძლია ბოდიში მოვიხადო", - განმარტა კობა ლურსმანაშვილმა.

პარლამენტში ქართული ოცნების დეპუტატმა და ხარაგაულის მაჟორიტარმა კობა ლურსმანაშვილმა, შს მინისტრისთვის კითხვის დასმის დროს, მხოლოდ ჰომოფობიური შინაარსის განცხადება გააჟღერა.

პლენარულ სხდომაზე დღეს, 18 მაისს დეპუტატები შს მინისტრ გიორგი გახარიას უსმენენ.