ირაკლი ალასანია აცხადებს, რომ კაბელების საქმეზე ის სამართლიანობას პრეზიდენტის ინსტიტუტში ხედავს და პეტიცია, რომლის მთავარი მოთხოვნაც ამ საქმეზე დაპატიმრებულთა გათავისუფლებაა, დასრულების შემდეგ იგი პრეზიდენტს გადაეცემა.

ირაკლი ალასანიამ კაბელების საქმეზე დღეს, თავისუფალმა დემოკრატების ცენტრალურ ოფისში გამართულ ბრიფინგზე ისაუბრა.

ალასანიას თქმით, პარტიის წარმომადგენლები კაბელების საქმეზე მუდმივად აწვდიან ინფორმაციას საერთაშორისო ორგანიზაციებსა და საქართველოში მეგობარი ქვეყნების საელჩოებს: "ამ დიდ უსამართლობას [სასამართლოს გადაწყვეტილება] ჩვენ ვაპროტესტებთ პროკურატურასთან".

მისივე თქმით, სასამართლოს გადაწყვეტილება პოლიტიკური ზეწოლის შედეგია:

"ათეულ ათასობით მოქალაქემ უკვე მოაწერა ხელი პეტიციას მსჯავრდებულთა გათავისუფლების მოთხოვნის შესახებ, რისთვისაც მინდა მადლობა გადავუხადო მათ. პეტიცია პრეზიდენტის სახელზეა გაკეთებული და უახლოეს პერიოდში წარვუდგენთ პრეზიდენტს, როდესაც კიდევ უფრო მეტი ხელმოწერა შეგროვდება". ალასანიამ ასევე მოუწოდა მოქალაქეებს, რომ აქტიურად გააგრძელონ ხელმოწერა, რადგან ეს დაეხმარება დაკავებულთა გათავისუფლებას.

"კაბელების საქმეზე" ადვოკატებმა საჩივარი შეიტანეს სააპელაციო სასამართლოში, სადაც უახლოეს მომავალში დაიწყება საქმის განხილვა. სარჩელი შეტანილია ასევე საკონსტიტუციო სასამართლოში.

თავისუფალი დემოკრატების ლიდერის თქმით, კაბელების საქმე იყო ის, რამაც 2 წლის წინ კოალიცია გახლიჩა.