პროექტის Check in Georgia–ს ფარგლებში, შავი ზღვის სანაპიროზე ყველაზე მასშტაბური, შავი ზღვის რიგით მეათე ჯაზფესტივალი გრძელდება. მესამე საფესტივალო დღეს სცენა ცნობილმა ამერიკელმა მომღერალმა, მის ლორენ ჰილმა დაიპყრო.

ბათუმის საჩოგბურთო კორტებზე გრემის მფლობელი რეპერის კონცერტმა სრული ანშლაგით ჩაიარა. მუსიკოსი სცენაზე 17–კაციანი ბენდით წარსდგა. ენერგიული რიტმები, სელფები მსმენელთან და ხალხით სავსე კორტები – ლორენ ჰილის კონცერტმა ამ რეჟიმში ჩაიარა.

ჯაზფესტივალის ორგანიზატორთა ინფორმაციით, კონცერტს 7 ათასი მსმენელი დაესწრო, ეს მაჩვენებელი ფესტივალის წინა დღეების სტუმართა რაოდენობას აშკარად სჭარბობს.

მის ლორენ ჰილი ამერიკელი მომღერალი, კომპოზიტორი, რეპერი, პროდიუსერი და მსახიობია; უფრო მეტად ცნობილია, როგორც ჯგუფ Fugees-ის წევრი. ლორენ ჰილმა მნიშვნელოვანი გავლენა იქონია თანამედროვე მუსიკის განვითარებაზე. მისი პირველი სოლო ალბომი „Miseducation of Lauryn Hill“ 1998 წელს გამოვიდა, ხუთი გრემი მოიპოვა და გაიყიდა მილიონობით ეგზემპლარი. განსაკუთრებით ცნობილია ლორენ ჰილის სიმღერები „Doo Wop“ და „To Zion”.

ფესტივალი 24 ივლისამდე გრძელდება. ბათუმელებსა და ბათუმის სტუმრებს, ფასიანი კონცერტების გარდა, საშუალება ექნებათ უფასოდ დაესწრონ BRASS BAND-ების კონცერტებს, რომელიც ბათუმის ბულვარში მთელი დღის განმავლობაში გაიმართება. ჯაზფესტივალის ფარგლებში, უცხოელი შემსრულებლების გარდა, ბათუმის კოლონადებთან კონცერტებს ქართული ჯაზბენდებიც გამართავენ.