ჩაკეტილი სივრცეების შიში აუცილებელი არაა იმისთვის, რომ ლიფტში გაჭედვის შეგეშინდეთ. ადამიანები, რომლებიც ლიფტში ერთხელ მაინც გაჭედილან, ამ შეგრძნებას შემაძრწუნებელსა და თავზარდამცემს უწოდებენ. ამიტომაც, მნიშვნელოვანია წინასწარ ვიცოდეთ, როგორ უნდა მოვიქცეთ საგანგებო სიტუაციაში, რათა ოთხ კედელში გამომწყვდეულს ექსპრომტად არ მოგვიწიოს გამოსავლის ძიება.

ტექნიკური რეგლამენტი ლიფტების უსაფრთხოებასთან დაკავშირებით 2013 წელს დამტკიცდა და ის ლიფტის მფლობელ კომპანიებს კონკრეტულ ვალდებულებებს აკისრებს:

  • ლიფტის მფლობელი ვალდებულია, შეაფასოს მის განკარგულებაში მყოფ ლიფტთან დაკავშირებული ყველა საფრთხე;
  • ლიფტის მფლობელმა უნდა უზრუნველყოს პერიოდული ტექნიკური დათვალიერება;
  • ყოველ კაბინაში უნდა იყოს მითითებული ტვირთამწეობა და დასაშვებ მგზავრთა რაოდენობა;
  • თუ ლიფტი დაპროექტებულია ისე, რომ მასში მყოფებს გამოსვლა სხვა პირების დახმარების გარეშე შეუძლიათ გამოსვლა, კაბინაში განთავსებული უნდა იყოს მკაფიო ინსტრუქცია;
  • კარის გაღება კაბინის მოძრაობის დროს შეუძლებელი უნდა იყოს;
  • ენერგიის გათიშვის შემთხვევაში ლიფტს უნდა ჰქონდეს თავისუფალი ვარდნისგან დამცავი მექანიზმი.

ამის მიუხედავად, დარწმუნებული ვერ იქნებით, რომ ყველა ლიფტი აკმაყოფილებს შესაბამის სტანდარტებს, უსაფრთხოების წესების ცოდნა კი ყველასთვის სასარგებლოა.

მაშ ასე, თუ ლიფტში გაიჭედეთ:

  • ღრმად ისუნთქეთ და დამშვიდდით. ნერვიულობა მხოლოდ ხელს შეგიშლით საღად აზროვნებაში.
  • არ ეცადოთ დამოუკიდებლად გამოღწევას ლიფტიდან. შეიძლება ლიფტი ბაქანთან სულაც არ იყოს ახლოს და ამით შახტაში ჩავარდნის რისკებს გაზრდით.
  • ნუ დაარტყამთ ფეხს კარებს. მკვეთრი მოძრაობებისგან თავი შეიკავეთ.
  • ეცადეთ, ვინმეს დაუკავშირდეთ. ზოგიერთ თანამედროვე ლიფტს ტექნიკური პერსონალი ემსახურება. თუ ეს ასე არაა, უბრალოდ დაუკავშირდით ვინმეს მობილურით. იმედია, ისე არ მოხდება, რომ მობილურიც დამჯდარი გქონდეთ.

თუ ფიქრობთ, რომ თქვენს შენობაში განთავსებული ლიფტი სახიფათოა, შეგიძლიათ მიმართოთ ლიფტის კომპანიას ან - ძველი ლიფტის შემთხვევაში - თბილისის მერიას.

ამავე თემაზე შეგიძლიათ ნახოთ "სხვა შუადღის" სპეციალური რეკომენდაციების ბლოკი: