ჩხოროწყუს საკრებულოს გადაწყვეტილებით, მუნიციპალიტეტში ნარკოლოგიურ დაწესებულებებში აღრიცხვაზე მყოფ პირებს შინაური ცხოველების, კატებისა და ძაღლების ყოლა, აკრძალული აქვთ. დადგენილება საკრებულომ 2017 წლის დეკემბერში მიიღო. პირველად ამის შესახებ ინფორმაცია რეგინფომ გაავრცელა.

დადგენილება ჩხოროწყუს მუნიციპალიტეტის ტერიტორიაზე ბინადარი შინაური ცხოველების (ძაღლები და კატები) მოვლა-პატრონობისა და მათი მართვის წესს ეხება.

დადგენილების მიხედვით, ასევე, მეპატრონე ვერ გახდება 18 წლამდე პირი მშობლის ან მეურვის თანხმობის გარეშე, ასევე, ქმედუუნაროდ აღიარებული პირი.

გარდა ამისა, დოკუმენტი განსაზღვრავს ცხოველის ყოლასთან დაკავშირებულ პირობებს: რეგისტრაცია, მოვლა, ვეტერინართან ვიზიტი, მოდარაჯე ძაღლის დაბმა და ა.შ.

მუნიციპალიტეტის საკრებულოს პრესსამსახურის უფროსმა On.ge-ს უთხრა, რომ ნარკოდამოკიდებულთათვის შინაური ცხოველების აკრძალვის პუნქტი ტექსტში შეცდომით გაიპარა, რაც უახლოეს სხდომაზე გამოსწორდება.

On.ge-ს კითხვაზე შეცდომის აღმოჩენას ოთხი თვე რატომ დასჭირდა, პრესსამსახურმა გვიპასუხა, რომ მათთვის "აჟიოტაჟის შემდეგ გახდა ცნობილი".

არის თუ არა დადგენილება დისკრიმინაციული On.ge პასუხს სახალხო დამცველისგან ელოდება.