წითელ ბაღთან მომხდარ დაპირისპირებაში, რის შედეგადაც ორი მოზარდი დაჭრეს, მესამე არასრულწლოვანიც მონაწილეობდა. ამის შესახებ ინფორმაცია On.ge-ის შინაგან საქმეთა სამინისტროში დაუდასტურეს. უწყების ცნობით, მესამე პირს სხეულზე ნაკაწრი აქვს და იგეგმება მისი დაკითხვა. ამჟამად, საქმეზე საგამოძიებო მოქმედებები მიმდინარეობს. შსს-ს ჯერ არავინ დაუკავებია.

ტელეკომპანია რუსთავი 2-თან საუბრისას ადვოკატმა რამაზ ჩინჩალაძემ განაცხადა, რომ მოზარდი გუშინ უკვე დაკითხა პოლიციამ და მას ისევ ელოდებიან საგამოძიებო უწყებაში.

დაჭრილი არასრულწლოვნები რესპუბლიკურ საავადმყოფოში იმყოფებიან. კლინიკის პრესსამსახურმა On.ge-ს უთხრა, რომ ორივე პაციენტი მიმღებ გადაუდებელ დეპარტამენტში, დაკვირვებისა და მკურნალობის ქვეშ რჩება. მისივე თქმით მოზარდების მდგომარეობა სტაბილურია.

რესპუბლიკური საავადმყოფოს ექიმის თქმით, პაციენტებს აღენიშნება გულ-მკერდის წინა ზედაპირზე, მარცხენა ნახევარში, ნაკვეთ-ნაჩხვლეტი ჭრილობა.

ორი მოზარდის დაჭრის ფაქტზე გამოძება სსკ-ის 117-ე მუხლით დაიწყო, რაც ჯანმრთელობის განზრახ მძიმე დაზიანებას გულისხმობს. დაჭრის მიზეზი ჯერ უცნობია.