წინა ხელისუფლების მაღალჩინოსანი, ბაჩო ახალაია, რომელიც სასჯელს ციხეში იხდის აცხადებს, რომ პრეზიდენტის მიერ მისი შეწყალების საკითხის განხილვის წინააღმდეგია. პატიმრობაში მყოფი ახალაიას სახელით განცხადება მის ფეისბუკგვერდზე გავრცელდა.

"ჩემთვის შეურაცხმყოფელია თქვენი [შეწყალების] კომისიის მხრიდან ჩემი თავისუფლების თაობაზე ნებისმიერი სახის მსჯელობის გამართვაც კი. ასეთი განცდისთვის მე ნამდვილად გამაჩნია ობიექტური საფუძვლები, ვინაიდან დღეს საქართველოს მართავს რუსული ძალა, რომელიც ყოველდღიურად იმყარებს პოზიციებს ქართულ საზოგადოებაში არსებული პოლიტიკური დაპირისპირებების ხარჯზე", - ვკითხულობთ ახალაიას ფეისბუკგვერდზე, სადაც ასევე აღნიშნულია, რომ საქართველოს პრეზიდენტი, გიორგი მარგველაშვილი ხელს უწყობს პოლიტიკური დაძაბულობის ზრდას.

ახალაია აცხადებს, რომ ის ნებისყოფით დაელოდება პოლიტიკური ცვლილებების ტალღას, რომელიც მისი გათავისუფლების გარანტია იქნება.

"რა თქმა უნდა, მე არ ვაპირებ და არ მსურს მთელი ცხოვრება ციხეში ვიყო. სიცოცხლეზე უფრო ძვირფასი თავისუფლება თავის დროზე შეგნებულად, ნებაყოფლობით, გაურკვეველი ვადით დავთმე საკუთარი პრინციპებისა დ საკუთარი სამშობლოსთვის ბრძოლის ერთგულების მიზნით. მოცემულობა ასეთად რჩება დღემდე", - დასძენს ის.

პრეზიდენტთან არსებული შეწყალების კომისიის ხელმძღვანელი, ზვიად ქორიძე ამბობს, რომ ახალაიას შეუძლია მისი საკითხის განხილვაზე უარი თქვას. ქორიძის თქმით, შეწყალების კომისიას ახალაიასა და ძალოვანი სტრუქტურების ყოფილი თანამშრომლების შეწყალების საკითხის განხილვაზე განცხადებით გენერალმა გოგი თათუხაშვილმა მიმართა.