ნარკოპოლიტიკის რეფორმასთან დაკავშირებით ჯანდაცვის კომიტეტმა და ნარკოპოლიტიკის ეროვნულმა პლატფორმა ერთობლივი კონფერენცია გამართეს. პლატფორმის წევრმა დავით ოთიაშვილმა განაცხადა, რომ რეფორმა სადამსჯელო მიდგომიდან დახმარების მიდგომაზე გადასვლას გულისხმობს:

"იმ ადამიანებს, ვისაც შეიძლება ჰქონდეს ნარკოტიკებთან დაკავშირებით პრობლემები, ახალი პოლიტიკის პირობებში ექნებათ შესაძლებლობა მიიღონ დახმარება, რომელიც მათ გამოჯანმრთელებაში შეუწყობს ხელს".

კანონპროექტის მიხედვით, ნარკოტიკის მცირე ოდენობაც განისაზღვრება. ასევე, პირადი მოხმარების შემთხვევაში პირი სისხლის სამართლის პასუხისგებაში არ მიეცემა, თუმცა დაეკისრება ადმინისტრაციული სასჯელი. ამავე კანონპროექტის მიხედვით, დაახლოებით, ათ ქალაქში უნდა გაიხსნას სარეაბილიტაციო ცენტრები.

პარლამენტის ჯანდაცვის კომიტეტის თავმჯდომარის აკაკი ზოიძის თქმით, კანონპროექტით არ ხდება მოხმარების წახალისება:

"ნარკოტიკის მოხმარება ისევ რჩება დასჯადი, რჩება უბრალოდ ადმინისტრაციული და არა საპატიმრო. ეს არის განსხვავება და ოდენობების განსაზღვრა. ეს არანაირად არ ნიშნავს იმას, რომ ამით ხდება რაიმე სახის წახალისება მოხმარების ან გასაღებაზე ზომების შერბილება".

პარლამენტის იურიდიული კომიტეტის თავმჯდომარემ ეკა ბესელიამ აღნიშნა, რომ მიზანი ნარკოდამოკიდებული ადამიანების რიცხვის შემცირებაა.

"მიზანი არის ის, რომ ქვეყანაში გვყავდეს რაც შეიძლება ცოტა და, იდეალურ შემთხვევაში, არც ერთი ნარკომანიით დაავადებული ადამიანი. შევამციროთ ზიანი საზოგადოებაზე და შევამციროთ ასეთი ადამიანების რაოდენობა იმით, რომ მათ ვუმკურნალოთ", - განაცხადა ბესელიამ.

მმართველი გუნდის მიერ ინიცირებული კანონპროექტის საკომიტეტო მოსმენები, სავარაუდოდ, 20 ნოემბრიდან დაიწყება. ამის შემდეგ პროექტი პლენარულ სესიაზე უნდა გადავიდეს და მას კენჭი ეყაროს.