6 ივლისს გამართულ ბრიფინგზე ცნობილი გახდა, რომ მთავრობის გადაწყვეტილებით, ანაკლიის ღრმაწყლოვანი ნავსადგური ე.წ. ლენდლორდის მოდელით აშენდება, რომლის ფარგლებშიც სახელმწიფო ძირითად საზღვაო და საპორტო ინფრასტრუქტურის მესაკუთრედ დარჩება და მის განვითარებასა და მართვას თავად უზრუნველყოფს. ჩინურ-სინგაპურული კონსორციუმი კი, რომელიც ტენდერში გამარჯვებულად მთავრობამ ჯერ კიდევ 2 წლის წინ გამოაცხადა, ანაკლიის პორტის მშენებლობას ჩამოშორდა.

ჩინეთის საელჩო "რადიო თავისუფლებისთვის" გამოგზავნილ წერილობით პასუხში აცხადებს, რომ "პატივს სცემენ და ესმით საქართველოს გადაწყვეტილება ამ საკითხთან დაკავშირებით. ჩინეთი კვლავაც წაახალისებს ჩინურ საწარმოებს ანაკლიის პორტის პროექტში მონაწილეობის მისაღებად, საბაზრო პრინციპებზე დაყრდნობით".

"პატივს ვცემთ და გვესმის საქართველოს გადაწყვეტილება ამ საკითხთან დაკავშირებით. ჩინური კომპანია, რომელიც მანამდე მონაწილეობდა ამ პროექტის ტენდერში, მკაცრად იცავდა საქართველოს კანონმდებლობასა და რეგულაციებს, ისევე როგორც საერთაშორისო კომერციულ წესებს და ინარჩუნებდა მჭიდრო კომუნიკაციასა და კოორდინაციას საქართველოს შესაბამის უწყებებთან პროექტთან დაკავშირებულ საკითხებზე. საქართველოს მთავრობამ გამოაცხადა, რომ ის ხელახლა გამოაცხადებს ტენდერს ანაკლიის პორტის პროექტზე — "მშენებლობისა" და "ოპერირების" კომპონენტებად დაყოფით", — წერს ჩინეთის საელჩო რადიო თავისფლებას.

საელჩო იმედოვნებს, რომ თბილისის გადაწყვეტილება "მონაწილეობის მისაღებად მოიზიდავს პორტების მშენებლობისა და ოპერირების უფრო მეტ კომპანიას, მთელი მსოფლიოდან" და ჩინეთი კვლავ იაქტიურებს:

"ჩინეთი კვლავაც წაახალისებს ჩინურ საწარმოებს ანაკლიის პორტის პროექტში მონაწილეობის მისაღებად, საბაზრო პრინციპებზე დაყრდნობით. ვისურვებდით ანაკლიის პორტის პროექტის ადრეულ დასრულებას, რათა მან უფრო მნიშვნელოვანი როლი შეასრულოს "შუა დერეფნის" საერთო კონკურენტუნარიანობის ამაღლებაში და წვლილი შეიტანოს ევრაზიის რეგიონში წარმოებისა და მიწოდების ჯაჭვების სტაბილურობაში". — წერს საელჩო.