23 ივლისიდან რუსთაველის გამზირის რეაბილიტაცია იწყება. თბილისის მერიის განცხადებაში ვკითხულობთ, რომ ქალაქის მთავარ გამზირზე და მერაბ კოსტავას ქუჩის ნაწილზე ყველა ტიპის ტრანსპორტის მოძრაობა 4 თვით შეიზღუდება.

20 ივლისს, თბილისის ტრანსპორტისა და ურბანული განვითარების სააგენტოს უფროსმა, ნინო ბაგაშვილმა საზოგადოებრივი მაუწყებლის ეთერში განაცხადა, რომ რეაბილიტაციის შემდეგ, დედაქალაქის ცენტრალური გამზირი "თითოეული საგზაო მონაწილისთვის თანაბრად იქნება გადანაწილებული".

"მაქსიმალურად ვეცდებით, რომ რუსთაველის გამზირი იყოს ადაპტირებლი არა მხოლოდ მანქანებისთვის. ახლა რუსთაველის გამზირი არის მხოლოდ მანქანების გამზირი. ადამიანებს არ შეუძლიათ ქუჩის გადაკვეთა, თუ არ ჩავიდნენ მიწისქვეშა გადასასვლელში. დამერწმუნეთ, რომ არა მხოლოდ მოხუცებისთვის ან ეტლიანი ადამიანებისთვის — ჩვენთვისაც ძალიან არაკომფორტულია. დღეს რუსთაველის გამზირზე ფეხით სიარული არ გიზიდავს — ახალი მულტიმოდალური დიზაინით, ეს გამზირი თითოეული საგზაო მონაწილისთვის — ეს იქნება ქვეითი, ველოსიპედის, ავტობუსის თუ მანქანის მგზავრი — თანაბრად იქნება გადანაწილებული, ხელმისაწვდომი და კომფორტული," — განაცხადა ბაგაშვილმა.

ბაგაშვილმა ასევე დასძინა, რომ განახლდება რუსთაველის გამზირის მიმდებარე ქუჩებიც.

"აბსოლუტურად ახალ სიცოცხლეს შეიძენს მიმდებარე ქუჩებიც. კერძოდ, ალექსანდრე ჭავჭავაძის, გრიბოედოვის ქუჩა," — განაცხადა მან.

როგორც თბილისის მერმა, კახა კალაძემ 21 ივლისს გამართულ დედაქალაქის მთავრობის სხდომაზე თქვა, სარეაბილიტაციო არეალი ორ კილომეტრამდე გზის სავალ ნაწილს მოიცავს.

"სარეაბილიტაციო არეალი მოიცავს თამარ ჭოველიძის ქუჩიდან თავისუფლების მოედნამდე არსებულ ტერიტორიას, სულ ორ კილომეტრამდე გზის სავალ ნაწილს. პროექტის პირველ ეტაპზე განხორციელდება მიწისქვეშა საკომუნიკაციო ქსელების განახლება - შეიცვლება წყალმომარაგების, წყალარინების, სანიაღვრე და გაზმომარაგების ცენტრალური სისტემები. ასევე, საჰაერო სადენები განთავსდება მიწისქვეშა საკაბელო არხებში. დამონტაჟდება მიწისქვეშა ნარჩენშემკრები ურნებიც. ამასთანავე, მოეწყობა თანამედროვე საგზაო ინფრასტრუქტურა, განახლდება გზის სავალი ნაწილი და ტროტუარი, დაიგება ასფალტის საფარი. სრულად შეიცვლება გარე განათების ქსელი და დამონტაჟდება თანამედროვე LED განათების სისტემა", — განაცხადა კახა კალაძემ.

თბილისის მერის თქმით, პროექტის მნიშვნელოვანი ნაწილი გამწვანებას დაეთმობა.

"განახლდება არსებული მწვანე სივრცეები და დაირგვება ხე-მცენარეები, რაც რუსთაველის გამზირს კიდევ უფრო მიმზიდველ და ეკოლოგიურად გაუმჯობესებულ გარემოდ აქცევს. განსაკუთრებული ყურადღება დაეთმობა ფეხით მოსიარულეთა უსაფრთხოებასა და კომფორტს - მოეწყობა მიწისზედა ქვეითთა გადასასვლელები, დამონტაჟდება საგზაო ნიშნები და დაიხაზება ჰორიზონტალური მონიშვნები. გამზირის ინფრასტრუქტურა სრულად ადაპტირდება შეზღუდული შესაძლებლობის მქონე პირებისთვის", — აღნიშნა კახა კალაძემ.

მისივე თქმით, სამუშაოები, რომელსაც თბილისის მერიის ინფრასტრუქტურის განვითარების საქალაქო სამსახური განახორციელებს, ნოემბრის ბოლოს დასრულდება.

bm.ge-ს ცნობით, მერია რეაბილიტაციის დეტალურ პროექტს უახლოეს პერიოდში გაასაჯაროებს. მათ მიერ მომზადებულ ვიზუალურ მასალაში ჩანს, რომ მიწისზედა გადასასვლელის მოწყობა სასტუმრო "ტელეგრაფსა" და სავაჭრო ცენტრ "მერანს" შორის იგეგმება, თუმცა საბოლოო პროექტი ფართო საზოგადოებისთვის ხელმისაწვდომი ჯერ-ჯერობით არაა.

რუსთაველის გამზირის რეაბილიტაციისთვის გამოცხადებული 20 მილიონი ლარის ღირებულების ტენდერებში გამარჯვებულად მიმდინარე თვის დასაწყისში შპს "სმარტ სოლუშენსი" გამოვლინდა.

რუსთაველის გამზირის პროექტის ფოტოებს BPN აქვეყნებს:

• 23 ივლისიდან რუსთაველის გამზირის რეაბილიტაცია იწყება — რუსთაველის გამზირი და მერაბ კოსტავას ქუჩის ნაწილი 4 თვით დაიკეტება