"ირანელმა აიათოლებმა რომ გაუგზავნონ მილოცვა, იქაც მივა მადლიერების წერილი. ტყუილად გიხარიათ. ორი ქვა უნდა გეჭიროთ და თავში ირტყამდეთ," — ამის შესახებ ლეიბორისტული პარტიის ლიდერმა, შალვა ნათელაშვილმა, "ტვ პირველთან" საუბრისას განაცხადა. მისი თქმით, აშშ-ის პრეზიდენტს, დონალდ ტრამპს ირაკლი კობახიძის მიერ გაგზავნილი მისალოცი წერილის საპასუხოდ დაწერილი განცხადება "არც წაუკითხავს, არც დაუწერია და არც ხელი მოუწერია".

"ტრამპს ეს არც წაუკითხავს, არც დაუწერია და არც ხელი მოუწერია. ამისათვის არის იქ კომპიუტერი, ხელოვნური ინტელექტი, კანცელარიის მუშაკი, რომელიც ავტომატურად აგზავნის მილოცვებზე პასუხებს. მათ შორის, ირანელმა აიათოლებმა რომ გაუგზავნონ მილოცვა, იქაც მივა მადლიერების წერილი დაახლოებით ამ შინაარსის. ასე რომ, ტყუილად გიხარიათ. ორი ქვა უნდა გეჭიროთ და თავში ირტყამდეთ.", — განაცხადა შალვა ნათელაშვილმა .

შეგახსენებთ,19 ივლისს მთავრობის ადმინისტრაციამ აშშ-ის პრეზიდენტის, დონალდ ტრამპის წერილი გაავრცელა, რომელშიც ის მთავრობის მეთაურს, ირაკლი კობახიძეს, აშშ-ის დამოუკიდებლობის დღის მილოცვისთვის პასუხობს.

"ბატონო პრემიერმინისტრო,

დიდი მადლობა ამერიკის დამოუკიდებლობის 250 წლის იუბილეს მოლოცვისთვის. დამოუკიდებლობის დღე ჩვენი ერის დაარსებისა და თავისუფლების, სიმტკიცისა და შეუპოვრობის იმ ურყევი სულისკვეთების ზეიმია, რაც ამერიკელ ხალხს ახასიათებს. ვამაყობთ იმ პრინციპებით, რომლებიც ჩვენს ქვეყანას მთელი ისტორიის მანძილზე უძღვებოდა და ვაფასებთ იმ პარტნიორთა მეგობრობას, რომლებიც იზიარებენ ამ იდეალებისადმი პატივისცემას. აღვნიშნავთ, რა დამოუკიდებლობის 250 წლის იუბილეს, მადლობელი ვარ, რომ გვიერთდებით სიცოცხლის, თავისუფლებისა და ბედნიერებისკენ სწრაფვის ამერიკული პრინციპების ზეიმში.

გულწრფელად ვაფასებ თქვენს ყურადღებიან გზავნილს. სუვერენიტეტის, უსაფრთხოებისა და ხანგრძლივი კეთილდღეობის მხარდასაჭერად ერთობლივი მუშაობით შეგვიძლია მნიშვნელოვანი პროგრესის მიღწევა. მოუთმენლად ველი ჩვენი თანამშრომლობის გაძლიერებას, რათა ერთად ვიაროთ მეტად უსაფრთხო, აყვავებული და მშვიდობიანი მომავლისკენ," — ვკითხულობთ ადმინისტრაციის გავრცელებულ წერილში.