თბილისში, ვაკე-საბურთალოს რაიონში, პოლიციამ უკრაინის ორი მოქალაქე დააკავა. შინაგან საქმეთა სამინისტროს ინფორმაციით, მათ ბრალად ედებათ ნარკოტიკების უკანონო შეძენა-შენახვა და ჯგუფურად, განსაკუთრებით დიდი ოდენობით ნარკოტიკების გაყიდვის ხელშეწყობის მომზადება. ინფორმაციას შსს ავრცელებს.

გამოძიების მიხედვით, დაკავებულებს შემუშავებული ჰქონდათ ნარკოტიკების გავრცელების სპეციალური სქემა და მათ სხვადასხვა მეთოდით გასაღებას გეგმავდნენ. პოლიციამ ექსპერიმენტის დროს ნივთმტკიცებად ამოიღო დიდი ოდენობით ნარკოტიკული საშუალება "მეთადონი", ხოლო ბრალდებულების ბინის ჩხრეკისას — ნარკოტიკების დასაფასოებელი მასალები. დანაშაული 20 წლამდე ან უვადო პატიმრობას ითვალისწინებს.

"შინაგან საქმეთა სამინისტროს თბილისის პოლიციის დეპარტამენტის ვაკე-საბურთალოს მთავარი სამმართველოს თანამშრომლებმა, ნარკოტიკული საშუალების უკანონო შეძენა-შენახვისა და წინასწარი შეთანხმებით ჯგუფის მიერ განსაკუთრებით დიდი ოდენობით ნარკოტიკული საშუალების უკანონო რეალიზაციის ხელშეწყობის მომზადების ბრალდებით, უკრაინის ორი მოქალაქე დააკავეს.

გამოძიებით დადგინდა, რომ ბრალდებულებმა ნარკოტიკების გავრცელების სქემა შეიმუშავეს და განსაკუთრებით დიდი ოდენობით ნარკოტიკული საშუალების გასაღებას სხვადასხვა მეთოდით გეგმავდნენ.

სამართალდამცველებმა საგამოძიებო ექსპერიმენტის დროს, ბრალდებულების მიერ მითითებული ადგილიდან განსაკუთრებით დიდი ოდენობით ნარკოტიკული საშუალება "მეთადონი" ნივთმტკიცებად ამოიღეს. ასევე, მათი დროებითი საცხოვრებელი სახლის ჩხრეკისას, ამოღებულია ნარკოტიკული საშუალების დაფასოებისთვის საჭირო მასალები.
გამოძიება სისხლის სამართლის კოდექსის 260-ე და 18 -260-ე კვარტა მუხლებით მიმდინარეობს, რაც 20 წლამდე ან უვადო თავისუფლების აღკვეთას ითვალისწინებს", — აღნიშნულია უწყების განცხადებაში.