ჩეჩნეთის ლიდერის, რამზან კადიროვის უფროსი ვაჟი, 20 წლის ახმატ კადიროვი მეორედ დაქორწინდა. ინტერნეტში გავრცელდა სადღესასწაულო ცერემონიის ფოტოები, სადაც OC Media-ს ცნობით, ახმატ კადიროვს 1,2 მილიონ დოლარად შეფასებული Graff MasterGraff-ის საათი უკეთია.

ჩეჩნური ოპოზიციური მოძრაობა NIYSO-ს ინფორმაციით, უფროსმა კადიროვმა, რომელიც ჩეჩნეთის მთავრობის თავმჯდომარეა, მეორე ცოლი 11 ივლისს, ახმატ-იურტში გამართულ დახურულ ცერემონიაზე შეირთო. ახმატ-იურტი (ყოფილი ცენტოროი) კადიროვების საგვარეულო სოფელია.

ირიბ მტკიცებულებად NIYSO-მ მოიყვანა ფოტო, რომელიც ინსტაგრამზე ჩეჩნეთის საგანგებო სიტუაციების მინისტრის, ალიხან ცაკაევის ვაჟმა, ამირხან ცაკაევმა გამოაქვეყნა. ფოტოზე ახმატ კადიროვი სადღესასწაულო სამოსშია გამოწყობილი. გარდა ამისა, ოპოზიციურმა მოძრაობამ გაავრცელა საზეიმო ფეიერვერკებისა და სროლების ამსახველი ვიდეოკადრები რომლებიც, მათივე განცხადებით, სწორედ იმ დღესაა გადაღებული. კადიროვის სავარაუდო მეორე ცოლის ვინაობა უცნობია.

რუსული დამოუკიდებელი გამოცემა Verstka-ს ჟურნალისტებმა დაადგინეს, რომ კადიროვს მაჯაზე დაახლოებით 1.2 მილიონი დოლარის ღირებულების საათი ეკეთა. მათი გამოძიების მიხედვით, ეს ბრიტანული წარმოების Graff MasterGraff-ის მოდელია, რომლის ვარდისფერი ოქროს ციფერბლატი გაფორმებულია 357 ბრილიანტით (საერთო წონით 36.46 კარატი) და ალიგატორის ტყავის სამაჯური აქვს. აღნიშნული მოდელი აღარ იწარმოება, მისი შეძენა საცალო გაყიდვაში შეუძლებელია.

OC-Media წერს, რომ ახმატ კადიროვი უკვე დაქორწინებულია. პირველად მან 2023 წლის მარტში, 17 წლის ასაკში იქორწინა. ეს ქორწილიც მკაცრად გასაიდუმლოებული იყო: სტუმრებსა და ადგილობრივ მაცხოვრებლებს გადაღება ეკრძალებოდათ, ხოლო პატარძლის ვინაობა ოფიციალურად არ დასახელებულა. მოგვიანებით გაირკვა, რომ მისი პირველი მეუღლე გროზნოს საქალაქო საკრებულოს დეპუტატის ქალიშვილი, ტამილა მახმატოვა იყო.

ქორწილამდე რამდენიმე დღით ადრე ახმატ კადიროვი კრემლში რუსეთის პრეზიდენტ ვლადიმერ პუტინს შეხვდა. მოგვიანებით რამზან კადიროვმა ამ შეხვედრას "არაფორმალური" უწოდა.

OC-Media-ს ცნობით, ანალოგიური სცენარით წარიმართა რამზან კადიროვის სხვა ვაჟების ქორწილებიც. 2024 წლის ივნისში, 17 წლის ელი კადიროვი სრულიად გასაიდუმლოებულ გარემოში დაქორწინდა. 2025 წლის ივნისში კი, ვლადიმერ პუტინთან საჯარო შეხვედრის შემდეგ, ცოლი 17 წლის ადამ კადიროვმაც შეირთო. ეს ქორწილიც ახმატ-იურტში გაიმართა. რამზან კადიროვის ვაჟების მეუღლეების ვინაობა ოფიციალურად, როგორც წესი, არასოდეს სახელდება.