ლენინგრადის ოლქის გუბერნატორმა ალექსანდრ დროზდენკომ სამსახურებრივი ავტომობილების საწვავით გამართვაზე შეზღუდვების დაწესების განკარგულება გასცა. ჩინოვნიკებზე ზუსტად ისეთივე ლიმიტები გავრცელდება, როგორიც ადგილობრივ მაცხოვრებლებზე. ინფორმაციას Meduza ავრცელებს.

ოლქის ხელმძღვანელმა აღნიშნა, რომ "ხელისუფლებამ პირადი მაგალითი უნდა აჩვენოს", როდესაც მოსახლეობას სთხოვს, გაგებით მოეკიდონ საწვავთან დაკავშირებულ "დროებით სირთულეებს".

"არანაირი გამონაკლისი არ იქნება. ეს [ლიმიტი] სრულიად საკმარისია მიმდინარე ამოცანების შესასრულებლად, ხოლო თუ რამე დაგვაკლდება, ვიდეოკონფერენციები კვლავინდებურად ხელმისაწვდომია. ზედმეტი მგზავრობა აღარ იქნება", — განაცხადა დროზდენკომ.

სანქტ-პეტერბურგში მოხელეებისთვის მსგავსი შეზღუდვები არ დაუწესებიათ. გამოცემა Rotonda-ს წყაროების თანახმად, იქ სამსახურებრივი ავტომობილები ჩვეულებრივად ივსება "როსნეფტის" ავტოგასამართ სადგურებზე. თუმცა, გამოცემის ცხელ ხაზზე ჟურნალისტს განუცხადეს, რომ სამსახურებრივ მანქანებს საწვავის მიღება რიგგარეშე შეუძლიათ.

როგორც გამოცემა Mediazona წერს, ლენინგრადის ოლქში ავტოგასამართი სადგურების ქსელები საწვავის გაყიდვაზე ლიმიტებს თავად აწესებენ. მაგალითად, ივნისის ბოლოს "ლუკოილი" ერთ მომხმარებელზე მაქსიმუმ 30 ლიტრ საწვავს გასცემდა.