ქალი, რომელიც სომხეთის პრემიერმინისტრ ნიკოლ ფაშინიანს ყარაბაღის ომთან დაკავშირებით დაუპირისპირდა, სამსახურიდან გაათავისუფლეს. არპინე სოღოიანი მიიჩნევს, რომ მისი დათხოვნა სწორედ პრემიერმინისტრთან კამათს უკავშირდება.

"რადიო თავისუფლების" ინფორმაციით, არპინე სოღოიანი ქანაქერ-ზეითუნის პოლიკლინიკის ქალთა კონსულტაციის განყოფილების ხელმძღვანელი იყო; იგი უკვე 21 წელია, გინეკოლოგად მუშაობს. სოღოიანს სამსახურიდან გათავისუფლების შესახებ 13 ივლისს აცნობეს.

ექიმი ნიკოლ ფაშინიანის მიერ არჩევნების მოგებიდან ორ თვეში დაითხოვეს. მუნიციპალიტეტის პრესსამსახურმა "რადიო თავისუფლებასთან" უარყო მისი პოლიტიკური ნიშნით გათავისუფლება და განაცხადა, რომ არპინე სოღოიანი რეორგანიზაციისა და შტატების შემცირების გამო დარჩა უსამსახუროდ.

რატომ დაუპირისპირდა ნიკოლ ფაშინიანი მოქალაქეს?

18 მაისს, ერევანში, არაბკირის რაიონში საარჩევნო კამპანიის მიმდინარეობისას, ნიკოლ ფაშინიანი არპინე სოღოიანს დაუპირისპირდა. სოციალურ ქსელში გავრცელებულ ვიდეოში ჩანს, რომ ფაშინიანსა და ქალს შორის კამათი მას შემდეგ გამწვავდა, რაც ამ უკანასკნელმა ყარაბაღის ომზე საუბრისას ფაშინიანი "სამშობლოს მოპარვაში" დაადანაშაულა.

"შენ ჩემი სამშობლო მომპარე, მთელი თაობა გაანადგურე, ჩემი ძმა, ჩემი სიხარული წამართვი, ჩვენი განადგურება სცადე, მაგრამ ვერ შეძელი," — ეუბნება სოღოიანი პრემიერს.

ფაშინიანსა და მოქალაქეს შორის შელაპარაკება კიდევ უფრო დაიძაბა, როცა ქალმა პრემიერს საუბარი გააწყვეტინა და უთხრა: "თქვენ ჩვენი გაცურება სცადეთ". საპასუხოდ, ფაშინიანმა ოპოზიციონერი პოლიტიკოსები ჩამოთვალა და მათი "განადგურებით" დაიმუქრა:

"თუ რობზე (ყოფილი პრეზიდენტი რობერტ ქოჩარიანი) მელაპარაკებით, მე გავანადგურებ რობს! რობი ციხეში ჩაჯდება, გავანადგურებ რობს! გავანადგურებ "კალუგელ კაცსაც" (შინაპატიმრობაში მყოფი სომეხი-რუსი მილიარდერი სამველ კარაპეტიანი), გავანადგურებ სერჟსაც (ყოფილი პრეზიდენტი სერჟ სარგსიანი) და გაგოსაც (ოპოზიციონერი მილიონერი ბიზნესმენი გაგიკ წარუკიანი)," — განაცხადა ფაშინიანმა.

ცნობისთვის, 6 ივლისს ჩხრეკა ჩატარდა პარტია აყვავებული სომხეთის ლიდერის, გაგიკ წარუკიანის კერძო სახლსა და კონცერნ "მულტი გრუფში" შემავალ თითქმის ყველა კომპანიაში, ისევე როგორც ამ ორგანიზაციების ხელმძღვანელთა ბინებში. ჩხრეკისას სამი ლომი, ერთი ვეფხვი და 200-მდე ფრინველის ფიტული აღმოაჩინეს. მოგვიანებით წარუკიანი თაღლითობისა და განსაკუთრებით დიდი ოდენობით ფულის გათეთრების ბრალდებით დააკავეს.