ექიმი-ინფექციონისტი გიორგი კამკამიძე სოციალურ ქსელში პოსტს აქვეყნებს, სადაც შავი ზღვის სანაპიროზე, კერძოდ ბათუმში, კუჭ-ნაწლავის ინფექციების გავრცელების მიზეზებზე წერს და ხელოვნური კუნძულის მშენებლობის ფონზე ინფექციებისა და სხვა ტიპის დაზიანებების ზრდას პროგნოზირებს.

ექიმის განცხადებით, ინტენსიური მშენებლობები გარემოს შეუქცევად ზიანს აყენებს, რაც პირდაპირ აისახება დამსვენებლების ჯანმრთელობაზე.

"უკვე "ეროვნულ ტრადიციად" იქცა შავი ზღვის სანაპიროზე, განსაკუთრებით ბათუმსა და მის მიმდებარე არეალებში, დამსვენებლებს შორის კუჭ-ნაწლავის ინფექციების ძალიან ხშირი გავრცელება. სტანდარტული სცენარია: "წავიყვანე ბავშვი ზღვაზე დასასვენებლად, საშინელი "ენტეროვირუსი" (არასწორი ტერმინი!) დაემართა და საავადმყოფოში მოვხვდით, გადასხმებს უკეთებდნენ, ძლივს გადარჩა; და მეც იგივე საშინელება მქონდა".

კუჭ-ნაწლავის ინფექციებთან დაკავშირებული ადამიანების კონცენტრირებისა და სანიტარული საკითხების შესახებ ბევრჯერ დაგვიწერია მეც და სხვა ექიმებსც. ამ შემთხვევაში მინდა გავამახვილო ყურადღება ეკოლოგიურ საკითხზე. ყველამ ვიცით, რომ ინტენსიური მშენებლობები გარემოს კატასტროფულ ზიანს აყენებს და იწვევს მის დაბინძურებას, რომლის გამოსწორებასაც ათწლეულები შეიძლება დასჭირდეს, ეს იმ შემთხვევაში, თუ ვინმე იზრუნებს გამოსწორებაზე. საქართველოს შემთხვევაში კი, დიდი ალბათობით, ეს ზიანი შეუქცევადი და მუდმივი იქნება.

რა პერსპექტივა გვაქვს მომავალში ამ მიმართულებით, ერთ მაგალითზეც შეიძლება გავიაზროთ: ბათუმში მიმდინარე ხელოვნური კუნძულის მშენებლობა შეამცირებს ზღვის წყლის ცირკულაციას და წარმოქმნის დამდგარ ან/და ნელა განახლებადი წყლის ზონებს. პროექტის ტერიტორიაზე ზემოქმედებს მდინარეების ჩამონადენი, ურბანული ზედაპირული წყლები და ახლომდებარე პორტი, რომლებიც სანაპირო ზოლში მიკროორგანიზმებსა და სხვა დამაბინძურებელ სუბსტანციებს დააკონცენტრირებს, რაც აუცილებლად გაზრდის კუჭ-ნაწლავის ინფექციებისა და სხვა ტიპის დაზიანებების რისკს.

მთის მასივების ეკოლოგიური გაჩანაგების ხარჯზე მოპოვებული "ინერტული მასალის" დახვავება ხელოვნურ კუნძულზე, ზღვის ფსკერის გაღრმავება და ფსკერული ნალექის მასშტაბური გადაადგილება წყალს მღვრიეს გახდის (დავემშვიდობებით ზურმუხტისფერ კრიალა აკვატორიას), გაათავისუფლებს ადრე დაგროვილ დამაბინძურებლებს, ხოლო დაბინძურებული წყალი სარეკრეაციო პლაჟებს მარტივად მიაღწევს და ადამიანებს ძალიან მარტივად შეექმნებათ ეპიდემიური აფეთქების საფრთხე ზღვის წყლის შემთხვევით გადაყლაპვის, უშუალო კონტაქტის ან დაბინძურებული ზღვის პროდუქტების მოხმარების გზით. რისკი განსაკუთრებით იზრდება თბილ ამინდში, ძლიერი ნალექისა (რაც დამახასიათებელია "ბათუმური მიკროკლიმატისათვის") და წყლის არასაკმარისი განახლების პირობებში.

ეს ჩემი "წინასწარმეტყველებაა", შეგიძლიათ არ დამიჯეროთ, თუმცა, გაგრძელება იქნება...", — დაწერა ექიმმა.