2023 წლის 30 ივლისს ლიზომ 10-თვიანი მსოფლიო ტურნე დაასრულა. მან ჩრდილოეთ ამერიკაში, ევროპაში, ოკეანეთსა და აზიაში 80 კონცერტი გამართა, გაყიდა 853 000-ზე მეტი ბილეთი და $86,3 მილიონის შემოსავალი მიიღო. რეპერიდან პოპვარსკვლავად ქცეული მომღერალი სამყაროს მწვერვალზე იყო. თუმცა, სულ მალე ყველაფერი თავდაყირა დადგა.

ტურნეს დასრულებიდან ორი დღის შემდეგ, მისმა სამმა ყოფილმა მოცეკვავემ განაცხადა, რომ ტურნეს განმავლობაში სექსუალური შევიწროების, მტრული სამუშაო გარემოს, რელიგიური და რასობრივი დისკრიმინაციისა და წონის გამო დაცინვის მსხვერპლნი გახდნენ. ორი მათგანი სამსახურიდან გაათავისუფლეს, ხოლო ერთმა თავად დატოვა პოზიცია. ბრალდებების გავრცელებას წამყვანი მედიასაშუალებებისა და სოციალური ქსელების მხრიდან უზარმაზარი კრიტიკის ტალღა მოჰყვა, რის შემდეგაც ლიზო საჯარო ყურადღებას ერიდებოდა.

ფოტო: WireImage

გასულ თვეში მისი ახალი ალბომი, Bitch გამოვიდა. ალბომის შეფასებები იმედგამაცრუებელი აღმოჩნდა, გაყიდვები კი — კიდევ უფრო მეტად. წინა 2 ალბომის წარმატების შემდეგ, ლიზოს ახალმა ნამუშევარმა ვერც აშშ-ის და ვერც ბრიტანეთის საუკეთესო ასეულის ჩარტებში ვერ შეაღწია. როგორც ჩანს, სამყარო ჯერ კიდევ არაა მზად, რომ ლიზოს აპატიოს, მიუხედავად იმისა, სიმართლეა თუ არა მის შესახებ არსებული ბრალდებები.

2025 წლის დეკემბერში მოსამართლემ დაადგინა, რომ წონის გამო დაცინვის ბრალდება არ შეიცავდა საკმარის საფუძველს სამოქალაქო სამართალწარმოების დასაწყებად. თუმცა, დანარჩენ ბრალდებებზე ჯერ ბევრი არაფერი ვიცით. ერთადერთი, რაც ცნობილია, არის ის, რომ ლიზო კატეგორიულად უარყოფს მათ საფუძვლიანობას.

კითხვაზე, ელოდა თუ არა ლიზო საზოგადოების ამხელა ყურადღებას, მომღერალი პასუხობს: "ყველაფერი მოულოდნელი იყო. გრემი — მოულოდნელი. პირველი ადგილები ჩარტებში — მოულოდნელი. დიდება — მოულოდნელი. საზოგადოების მხრიდან ყურადღება — მოულოდნელი. ერთადერთი რამ, რასაც ნამდვილად ველოდი, იყო ის, რომ რადგან მსუქანი, შავკანიანი და ბედნიერი გოგო ვარ, ისინი აუცილებლად ეცდებოდნენ ამის წართმევას. ისინი ყოველთვის შეეცდებოდნენ ჩემს განადგურებას".

თუმცა, როგორც პოპვარსკვლავი ამბობს, მეგობრების მხარდაჭერითა და დიდი ძალისხმევით, ის მაინც ახერხებს, რომ საზოგადოებრივი კრიტიკისა და სიძულვილის მიუხედავად ბედნიერება შეინარჩუნოს.

მე ვარ იმის ცოცხალი მტკიცებულება, რომ რაც უნდა მოხდეს, შენ მაინც გაიღვიძებ და გექნება შესაძლებლობა, ეს დღე წინა დღეზე უკეთესი გახადო — ლიზო