ამერიკელი სენატორი ლინდსი გრემი 11 ივლისს მოულოდნელად გარდაიცვალა. აშშ-ის კოლუმბიის ოლქის (ვაშინგტონის) სამედიცინო ექსპერტის წინასწარი შემოწმების თანახმად, მისი მოულოდნელი გარდაცვალება გულის პრობლემამ გამოიწვია. ინფორმაციას POLITICO ავრცელებს.

გრემის ოფისის მიერ გავრცელებული წინასწარი დასკვნის მიხედვით, სიკვდილის მიზეზი გახდა "აორტის დისექცია, გამოწვეული არტერიოსკლეროზული გულ-სისხლძარღვთა დაავადებით". აორტის დისექცია სიცოცხლისთვის საშიში გადაუდებელი სამედიცინო მდგომარეობაა, რომლის დროსაც ზიანდება (იგლიჯება) სხეულის მთავარი არტერიის — აორტის შიდა კედელი.

"გარდაცვალების მოწმობის გაცემა მოლოდინის რეჟიმში დარჩება იქამდე, სანამ ყველა ტოქსიკოლოგიური და მიკროსკოპული კვლევა არ დასრულდება. ამის შემდეგ გარდაცვალების მოწმობა განახლდება, რათა მასში აისახოს სიკვდილის ზუსტი მიზეზი და სათანადოდ კლასიფიცირდეს სიკვდილის ფორმა“, — ნათქვამია განცხადებაში.

მეტროპოლიტენის პოლიციის უფროსმა ჯეფრი უ. ქეროლმა და კოლუმბიის ოლქის მთავარმა სამედიცინო ექსპერტმა ფრანსისკო ხ. დიასმა წინასწარი შემოწმების შედეგები ერთობლივ განცხადებაში დაადასტურეს.

"როდესაც კოლუმბიის ოლქში აუტოფსია ტარდება, პათოლოგანატომი ასევე ნიშნავს კომპლექსურ ტოქსიკოლოგიურ და მიკროსკოპულ კვლევებს, რომელთა დასრულებასაც დრო სჭირდება. როგორც კი შედეგები ცნობილი გახდება და გამოძიება დასრულდება, მთავარი სამედიცინო ექსპერტის ოფისი დაუკავშირდება გარდაცვლილის ახლობლებს და სიკვდილის მოწმობაში სტატუსი "მოლოდინში" შეიცვლება სიკვდილის კონკრეტული მიზეზითა და მისი ფორმის კლასიფიკაციით", — განაცხადეს მათ.

POLITICO წერს, რომ ეს დეტალები მას შემდეგ გახდა ცნობილი, რაც გრემის ოფისმა კვირას, 12 ივლისს განაცხადა, რომ ოთხი ვადით არჩეული რესპუბლიკელი სენატორი შაბათს, "ხანმოკლე და უეცარი ავადმყოფობის" შედეგად გარდაიცვალა.

"შაბათს, 11 ივლისს, საღამოს, აშშ-ის სენატორი ლინდსი გრემი ხანმოკლე და უეცარი ავადმყოფობის გამო გარდაიცვალა. სენატორ გრემის ოჯახი მადლობელია ამ წუთებში ლოცვისთვის და ითხოვს კონფიდენციალურობის დაცვას ამ წარმოუდგენლად მძიმე პერიოდში", — ნათქვამია განცხადებაში.

გამოძახების აუდიოჩანაწერის მიხედვით, სასწრაფო სამედიცინო დახმარების სამსახური შაბათს, საღამოს 8:27 საათზე, გრემის კაპიტოლიუმის ჰილზე მდებარე სახლში გამოცხადდა — პაციენტს "გულმკერდის არეში ტკივილები" ჰქონდა.