"ოპოზიციის სტრატეგია გაცხადებულია: შიგნით აქცია, გარეთ სანქცია, ალტერნატივა" — ამის შესახებ კოალიცია ცვლილებისთვის ლიდერი ნიკა გვარამია სოციალურ ქსელში წერს. მისი თქმით, ოპოზიციის სტრატეგია გაცხადებულია, წარმატებისთვის აუცილებელია ოპოზიციის ერთიანობა, ხოლო ისინი, ვინც გაერთიანებას ეწინააღმდეგებიან, ამ სტრატეგიას საბოტაჟს უწყობენ.

ამ განცხადებაზე, ჟურნალისტის კითხვის საპასუხოდ, ირაკლი კობახიძემ განაცხადა, რომ მსგავსი მიდგომა "მოღალატეობრივი" და "ანტისახელმწიფოებრივია".

"თქვენ იცით, რომ საქმე არის აღძრული ამ მიდგომასთან დაკავშირებით, რაც არის მოღალატეობრივი მიდგომა, რაც არის ფართო გაგებით დანაშაულებრივი მიდგომა. ვნახოთ, რა კვალიფიკაციას მისცემენ ამას საგამოძიებო უწყებები, მაგრამ ზუსტად ეს არის საკუთარი ქვეყნის ღალატი. "შიგნით აქცია, გარეთ სანქცია" არის, ანუ ქვეყნის შიგნით შეკრება 150 კაცი, იმისათვის, რომ გარეთ შექმნა ფონი მტრული საქმიანობისთვის. ეს არის ძალიან მარტივი ლოგიკა, რომელსაც ეფუძნება მათი დანაშაულებრივი, ანტისახელმწიფოებრივი, მოღალატეობრივი საქმიანობა.

რა თქმა უნდა, ამას სათანადო პასუხი უნდა გაეცეს. ამას 2024-2025 წლებში სათანადო პასუხი გასცა არჩევნებზე საზოგადოებამ, თუმცა ეს არ არის საკმარისი. თქვენ იცით, რომ ჩვენ გვაქვს მომზადებული სარჩელი ასევე საკონსტიტუციო სასამართლოში. ზუსტად ეს მიდგომა — "ქვეყანაში აქცია, გარეთ სანქცია" — ამყარებს იმ სარჩელს, რომელიც შეტანილია საკონსტიტუციო სასამართლოში. ეს არის ღია, მტრული დამოკიდებულება საკუთარი ხალხის მიმართ, საკუთარი სახელმწიფოს მიმართ, საკუთარი ქვეყნის მიმართ და ამას სჭირდება სათანადო სამართლებრივი პასუხიც", — განაცხადა კობახიძემ.