მონაკოში უკრაინელი ბიზნესმენის, ვადიმ ერმოლაევის საცხოვრებელ სახლთან მომხდარი აფეთქების საქმეზე ძებნილი ქალი უკრაინაში გარდაცვლილი იპოვეს.

39 წლის ანასტასია ბერეზოვსკაია, რომელსაც მონაკოს პროკურატურა მკვლელობის მცდელობის საქმეზე ეძებდა, კიევის მახლობლად ცეცხლსასროლი იარაღით მოკლული იპოვეს. უკრაინული მედიის ინფორმაციით, მისი ცხედარი 6 ივლისის ღამეს იპოვეს.

საქმე 29 ივნისს მონაკოში მომხდარ აფეთქებას უკავშირდება. ასაფეთქებელი მოწყობილობა ვადიმ ერმოლაევის სახლთან დატოვებულ ამანათში იყო დამონტაჟებული. აფეთქების შედეგად სამი ადამიანი დაშავდა, მათ შორის თავად ერმოლაევმა ფეხის მძიმე დაზიანებები მიიღო.

მონაკოს პროკურატურამ თავდაპირველად გაავრცელა ქალის ფოტო, რომელსაც ასაფეთქებელი მოწყობილობის ადგილზე დატოვებაში ედებოდა ბრალი, მოგვიანებით კი მკვლელობის მცდელობის, ასაფეთქებელი მოწყობილობის განთავსებისა და დანაშაულებრივ შეთქმულებაში მონაწილეობის ბრალდებით ინტერპოლმა ანასტასია ბერეზოვსკაიაზე "წითელი ცირკულარი" გამოსცა.

გამოძიების ფარგლებში გერმანიის სამართალდამცველებმა გასულ კვირას გაჩხრიკეს უკრაინის მოქალაქე 39 წლის ქალის ნაქირავები ბინა და ავტომობილი. მანამდე ფრანგული გამოცემა Le Figaro წერდა, რომ გამომძიებლები არ გამორიცხავდნენ უკრაინის უსაფრთხოების სამსახურის (SBU) შესაძლო კავშირსაც თავდასხმასთან. იმავე ვერსიით, აფეთქება შესაძლოა გაფრთხილების გზავნილი უფრო ყოფილიყო, ვიდრე მკვლელობა.

უკრაინული გამოცემა იუწყება, რომ საქმეზე დაკავებულია ორი პირი, რომელთაგან ერთი უკრაინის სამხედრო დაზვერვის (HUR) მოქმედი თანამშრომელია, მეორე კი ყოფილი სამართალდამცველი.

ცნობისთვის, ვადიმ ერმოლაევი უკრაინელი ბიზნესმენია, რომელიც უკრაინის სანქციების სიაში მას შემდეგ მოხვდა, რაც, ოფიციალური მონაცემებით, ოკუპირებულ ყირიმში საქმიანობა განაგრძო. 2019 წელს მან უკრაინის მოქალაქეობაზე უარი თქვა და კვიპროსის მოქალაქეობა მიიღო.