კომუნიკაციების კომისიამ (ComCom) "ტელეკომპანია პირველი" "მაუწყებლობის შესახებ" საქართველოს კანონის დარღვევის გამო 2500 ლარით დააჯარიმა. გადაწყვეტილება კომისიის მიერ 11-დან 13 მაისის ჩათვლით ჩატარებულ მონიტორინგს ეფუძნება.

ComCom-ის ცნობით, მონიტორინგის შედეგად, ტელეკომპანიის 11:00, 15:00 და 20:00 საათიან საინფორმაციო გამოშვებებში საჯარო პოლიტიკის მიმდინარე საკითხების გაშუქებისას კანონდარღვევის რამდენიმე შემთხვევა დაფიქსირდა. კერძოდ, კომისიის განმარტებით, აღნიშნულ პროგრამებში მოვლენების გაშუქება მაუწყებლის პირადი დამოკიდებულებისა და მოსაზრების საფუძველზე მოხდა.

"სინდისის პატიმრები", "ცრუ მოწმე პოლიციელების ჩვენებების საფუძველზე გასამართლებულები", "ოცნების გამოძიების", "ოლიგარქი", "სინდისისა და პოლიტპატიმრების", "სინდისის პატიმრებს, "არარსებული დანაშაული", "რას ამბობენ ქართული ოცნების რიგითი წევრები ბევრს არაფერს არ ნიშნავს, რადგან პრაქტიკა აჩვენებს, რომ მაინც ყველაფერი ისე მოხდება, რასაც ბიძინა ივანიშვილი იტყვის. შესაბამისად, თუ პოლიტიკური გადაწყვეტილება იქნება ბიძინა ივანიშვილის, რომ ციხის კარი გაუხსნა სინდისის პატიმრებს თუ პოლიტიკურ ტყვეებს, ამას ის გააკეთებს", "ციხის კარის გაღება სინდისის პატიმრებისა და პოლიტიკური ტყვეებისთვის იქნება გამართლებული ნაბიჯი ქრისტიანულად ადამიანურად და სახელმწიფოებრივად", "ქართული ოცნება კი სინდისის პატიმრებისგან ისევ არარსებული დანაშაულის აღიარებას ელოდება", "ეს იქნება უმძიმესი ფინანსური დარტყმა ბიძინა ივანიშვილის რეჟიმისთვის", "რომელიც ოცნებამ სამაგალითოდ დასაჯა", "ქართული ოცნების დეპუტატები წყობიდან გამოჰყავს. ოლიგარქის პარტიამ ლიდერის დაცვა დღეს სალომე ზურაბიშვილზე თავდასხმით გადაწყვიტა", "აქტივისტების ტერორი გრძელდება" — კომისიამ მიიჩნია, რომ ტელეკომპანიამ აღნიშნნული ფრაზების გამოყენებით ახალი ამბების პროგრამაში საკითხი მაუწყებლის პირადი დამოკიდებულების ან მოსაზრების საფუძველზე გააშუქა, რითაც "მაუწყებლობის შესახებ" კანონის 54-ე მუხლის "სამართლიანობა და მიუკერძოებლობა" მე-5 პუნქტი დაარღვია.

კომისიამ დაადგინა, რომ საინფორმაციო გამოშვებებში გაჟღერებული ფრაზები ეკუთვნოდათ უშუალოდ ტელეკომპანიის წამყვანებსა და ჟურნალისტებს და არა მესამე პირებს.

"კომისიამ დაადგინა, რომ მონიტორინგის ფარგლებში გამოვლენილი ფრაზები გამოთქმულია მაუწყებლის წარმომადგენლების, ახალი ამბების პროგრამის წამყვანების ან ჟურნალისტების მხრიდან და გამოხატულია როგორც მათი საკუთარი მოსაზრებები და არა მესამე პირთა შეფასებები. კანონის შესაბამისად, მაუწყებელმა ახალი ამბები მაუწყებლის პირადი დამოკიდებულების ან მოსაზრების საფუძველზე არ უნდა გააშუქოს. მოცემულ შემთხვევებში კი მაუწყებლის წამყვანების/ჟურნალისტების მიერ წარმოთქმული ფრაზები მათი კონტექსტის, გავრცელების ფორმის, შინაარსისა და ინტენსივობის გათვალისწინებით წარმოადგენს სწორედ მაუწყებლის პირადი დამოკიდებულების ან მოსაზრების საფუძველზე ახალი ამბების გაშუქებას", — აღნიშნულია ComCom-ის განცხადებაში.

ComCom აღნიშნავს, რომ ვინაიდან მიმდინარე წლის განმავლობაში "ტელეკომპანია პირველის" მიმართ მსგავსი დარღვევისთვის წერილობითი გაფრთხილება უკვე გამოყენებული იყო, აღნიშნული ფაქტი განმეორებით ქმედებად შეფასდა. ამ გარემოების გათვალისწინებით, კომუნიკაციების კომისიამ ტელეკომპანიას კანონით განსაზღვრული მინიმალური ფინანსური სანქცია — 2500 ლარის ოდენობით ჯარიმა დააკისრა.