"დავაახლოებთ საქართველოს პარლამენტის აკრედიტაციის სისტემას ევროპულ სისტემასთან. პირველ ჯერზე იქნება 1 თვე, მეორე ჯერზე, 1 წლამდე აკრედიტაციის შეჩერების შესაძლებლობა", — ამის შესახებ პარლამენტის თავმჯდომარემ, შალვა პაპუაშვილმა ბრიფინგზე ჟურნალისტებთან საუბრისას განაცხადა. მისი განმარტებით, ევროპარლამენტში კიდევ უფრო მკაცრი წესები არსებობს. ამას გარდა, მისივე თქმით ჟურნალისტთან ერთად პასუხისმგებლობა მედიაკომპანიასაც დაეკისრება.

"საქართველოს პარლამენტში აკრედიტაციის წესების დარღვევის დროს პირველ ჯერზე არის 1 თვე აკრედიტაციის შეჩერება, განმეორებით შემთხვევაში არის 6 თვე. ვნახეთ, რომ ევროპარლამენტში 1-წლიანი შეჩერებაც არსებობს. ამიტომ, დავაახლოებთ საქართველოს პარლამენტის აკრედიტაციის სისტემას ევროპულ სისტემასთან. პირველ ჯერზე იქნება 1 თვე, მეორე ჯერზე, 1 წლამდე აკრედიტაციის შეჩერების შესაძლებლობა.

საქართველოს პარლამენტში აკრედიტაციის წესების დარღვევის შემთხვევაში მხოლოდ ჟურნალისტის წინააღმდეგ გამოიყენებოდა სანქცია 1 თვე, ან 6 თვე და ვნახეთ ჩვენ, რომ ევროპარლამენტში ვნახეთ, რომ არამხოლოდ ჟურნალისტის, მედიის მიმართაც შესაძლებელია სანქციის გამოყენება, ამიტომ დავაახლოებთ საქართველოს პარლამენტის აკრედიტაციის სისტემას ევროპულ სისტემასთან და აქაც დარღვევის სიმძიმის და სიხშირის გათვალისწინებით შესაძლებელი იქნება რომ გაუუქმდეს მთლიანად მედიას აკრედიტაცია 1 წლამდე ვადით. არსებითად, ეს 2 საკითხია, რომელიც ჩვენ ვნახეთ ევროპარლამენტის გამოცდილებით და გვაქვს სურვილი რომ გადმოვიღოთ ეს გამოცდილება.

...რაც შეეხება პარლამენტში მუშაობას, ამას აქვს თავისი წესები. აკრედიტაციის წესები კრიტიკის ქვეშ იყო დიდი ხნის განმავლობაში და ჩვენ აღმოვაჩინეთ, რომ თურმე, ევროკავშირის პარლამენტში კიდევ უფრო მკაცრი წესები და სტანდარტები არსებობს ჟურნალისტურ საქმიანობასთან დაკავშირებით. ასე რომ, ჩვენ მაშინაც ვთქვით კიდევაც, რომ გავეცნობით ევროპარლამენტის პრაქტიკას და ის, რაც შეიძლება საინტერესო ყოფილიყო საქართველოს პარლამენტისთვის, ამას დავამკვიდრებთ", — განაცხადა შალვა პაპუაშვილმა.

პაპუაშვილმა ასევე აღნიშნა, რომ დარღვევად არ ითვლება კითხვის დასმა და ჟურნალისტის ტონი, თუმცა პარლამენტის წევრის სამუშაო ოთახში ნებართვის გარეშე შესვლა და გადაღება დარღვევაა. მისი თქმით, პროექტი უკვე მომზადებულია და დღესვე შეძლებენ ბრძანებაში ცვლილების შეტანას.

"კითხვის დასმა დარღვევა არ არის, ტონი დარღვევა არ არის, შეურაცხყოფა დარღვევა იქნება. დარღვევებია მაგალითად, ნებართვის გარეშე პარლამენტის წევრის სამუშაო ოთახში შესვლა და გადაღება... აკრედიტაციის წესი დადგენილი არის პარლამენტის თავმჯდომარის ბრძანებით და ამ ბრძანებაში შევა ცვლილებები. მომზადებულია უკვე პროექტი და ვფიქრობ, დღეს უკვე საბოლოო ვერსიას დავასრულებთ და დღესვე შევძლებთ ამ ბრძანებაში ცვლილების შეტანას", — თქვა პაპუაშვილმა.

შეგახსენებთ, პარლამენტის თავმჯდომარემ, შალვა პაპუაშვილმა მსგავსი განცხადება მანამდეც გააკეთა. მან 14 მაისს გამართულ ბრიფინგზე თქვა, რომ პარლამენტში აკრედიტაციის წესების გამკაცრებაზე იფიქრებს. მან ევროპარლამენტში მოქმედ წესებთან გაავლო პარალელი და თქვა, რომ შესაძლოა საქართველოშიც მხოლოდ რესპონდენტის თანხმობის შემთხვევაში შეძლონ ჟურნალისტმა კომენტარის ჩაწერა და აკრედიტაციის აკრძალვის ვადებიც გამკაცრდეს.