სრულიად საქართველოს კათოლიკოს-პატრიარქმა შიო III-მ ამაერიკის შეერთებული შტატების სახელმწიფო დეპარტამენტის წარმომადგენლები მიიღო. ინფორმაციას საქართველოს საპატრიარქოს საზოგადოებასთან ურთიერთობის სამსახური ავრცელებს.

27 მაისს გამართულ შეხვედრას აშშ-ის მხრიდან სახელმწიფო დეპარტამენტის წარმომადგენლები, ჩარლზ იოქი და პიტერ ანდრეოლი, თანმხლებ პირებთან ერთად და საქართველოში ამერიკის შეერთებული შტატების ელჩის მოვალეობის შემსრულებელი ალან პერსელი ესწრებოდნენ.

საქართველოს მართლმადიდებელი ეკლესიის მხრიდან შეხვედრაში მონაწილეობდნენ: ფოთისა და ხობის მიტროპოლიტი გრიგოლი, ზუგდიდისა და ცაიშის მიტროპოლიტი გერასიმე, გორისა და ატენის მიტროპოლიტი ანდრია, პროტოპრესვიტერი გიორგი ზვიადაძე, კათოლიკოს-პატრიარქის მდივანი, დეკანოზი მიქაელ ბოტკოველი, საპატრიარქოს საზოგადოებასთან ურთიერთობის სამსახურის ხელმძღვანელი, დეკანოზი ანდრია ჯაღმაიძე და მისი მოადგილე, დეკანოზი გურამ ჭარელაშვილი.

საპატრიარქოს საზოგადოებასთან ურთიერთობის სამსახურის ცნობით, ამერიკული დელეგაციის წევრებმა საქართველოს ეკლესიის მეთაურს კათოლიკოს-პატრიარქად აღსაყდრება მიულოცეს და რამდენჯერმე გაუსვეს ხაზი მართლმადიდებელი ეკლესიის განსაკუთრებულ როლს ქვეყნის ისტორიაში.

საუბარი, ასევე, შეეხო ორ ქვეყანას შორის არსებულ ურთიერთობებსა და საერთო ქრისტიანულ ფასეულობებს. მხარეებმა კიდევ ერთხელ დაადასტურეს მზაობა, ხელი შეუწყონ თანამშრომლობის გაღრმავებასა და ამ ღირებულებების განმტკიცებას.

ამასთანავე, რადგან წელს საქართველოში ქრისტიანობის სახელმწიფო რელიგიად გამოცხადების 1700 წლისთავი აღინიშნება, სრულიად საქართველოს კათოლიკოს-პატრიარქმა აშშ-ის სახელმწიფო დეპარტამენტის დელეგაცია ამ საიუბილეო თარიღთან დაკავშირებით დაგეგმილ საზეიმო ღონისძიებებზე მიიწვია.

შეხვედრის დასასრულს, სტუმრებმა მის უწმინდესობასა და უნეტარესობას გულთბილი და მასპინძლობისთვის მადლობა გადაუხადეს.

შეგახსენებთ, საქართველოში აშშ-ის სახელმწიფო დეპარტამენტის წარმომადგენლები ოფიციალური ვიზიტით იმყოფებიან. დელეგაცია ქვეყანაში 24 მაისს ჩამოვიდა და ვიზიტს 29 მაისამდე გააგრძელებს.

ვიზიტის ფარგლებში ამერიკელი წარმომადგენლები უკვე შეხვდნენ ხელისუფლებისა და პოლიტიკური პარტიების წარმოამდგენლებს.