თბილისის საპატრულო პოლიციის მთავარი სამმართველოს უფროსმა, გოგა მემანიშვილმა განაცხადა, რომ ოპოზიციის ალიანსს აქციაზე ტექნიკას ვერ შეატანინებენ, რადგან მათ შესაბამისი ნებართვა არ აქვთ.

რუსთაველის გამზირზე პარტია ფედერალისტების ერთ-ერთ ლიდერ თამარ ჩერგოლეიშვილთან საუბრისას მემანიშვილმა აღნიშნა, რომ ალიანსის მიერ გაგზავნილი პირველი განცხადება დახარვეზდა, ხოლო მეორე დაკორექტირებული განცხადების განხილვის 5-დღიანი ვადა ჯერ არ გასულა და შესაბამისად, ოპოზიციონერ პოლიტიკოსებს ტექნიკის შეტანის საშუალებას არ მისცემდნენ.

"არავინ არ გიშლით ხმის ამოღებას... პირველი განცხადება როდესაც შემოიტანეთ, ამის შემდეგ დააკორექტირეთ თქვენი განცხადება, მაგრამ ვადაში ვერ ეტევით. გუშინ შემოიტანეთ განცხადება და გვაქვს 5-დღიანი განხილვის ვადა. ან დაელოდეთ მაგ 5 დღეს, ან არა და... ვადაში ვერ ეტევით, შესაბამისად არ გაძლევთ უფლებას...", — განაცხადა გოგა მემანიშვილმა ("ტვ პირველი")

იგივე განცხადება გააკეთა მემანიშვილმა ჟურნალისტებთან საუბრისას. მან განმარტა, რომ თუ აქცია ორი თვით ადრე იყო დაანონსებული, განცხადების ადრე გაგზავნაც შესაძლებელი იყო.

"რამოდენიმე დღის წინ შემოიტანეს განცხადება. დახარვეზდა ეს განცხადება, პასუხი ეცნობათ. დააკორექტირეს ეს განცხადება და ხელახლა შემოიტანეს. შემოიტანეს გუშინ, დღეს არის აქცია. 5-დღიანი განხილვის ვადა აქვს, შესაბამისად ჯერ-ჯერობით ვადაში [ვერ ჩაეტივნენ]. მათთვის [ვადის შესახებ] ცნობილი იყო... თუ ორი თვით ადრე დააანონსეს აქცია, შეეძლოთ [ადრე გამოეგზავნათ]", — განაცხადა მემანიშვილმა ("ტვ პირველი").

ჟურნალისტის კითხვაზე მისცემს თუ არა ის პოლიტიკოსებს აქციაზე დინამიკების შეტანის უფლებას, მემანიშვილმა განაცხადა: "არა, რა თქმა უნდა".

ცოტა ხნის წინ, კოალიცია ცვლილებისთვის ერთ-ერთმა ლიდერმა, ნიკა გვარამიამ და დღევანდელი აქციის ერთ-ერთმა ორგანიზატორმა სოციალურ ქსელში დაწერა, რომ მანქანა, რომელშიც აქციისთვის საჭირო ტექნიკა ჰქონდათ, პოლიციამ წაართვათ.

"მანქანა ტექნიკით წაგვართვა პოლიციამ!

მიდით, მიაწექით ქოცებო! ახლა სხვა მანქანებსაც გამოეკიდეთ და ირბინეთ ასე წინ და უკან, უთავმოყვარეო ბანდიტებო!

მაინც გავიგონებთ ერთმანეთის ხმას, არ იდარდოთ! მთავარია ბევრნი ვიყოთ!
7-ზე უნივერსიტეტის პირველ კორპუსთან და იქიდან მსვლელობით რუსთაველზე! — წერს ნიკა გვარამია.

26 მაისს ოპოზიციის ალიანსის ორგანიზებით საპროტესტო აქცია გაიმართება. მათი ინფორმაციით, აქციის მონაწილეები 19:00 საათიდან თბილისის სახელმწიფო უნივერსიტეტის პირველ კორპუსთან შეიკრიბებიან და შემდეგ მარშით რუსთაველზე წავლენ