შიო III-ის ინტრონიზაცია ხვალ, 12 მაისს, სვეტიცხოვლის საკათედრო ტაძარში გაიმართება. ამის შესახებ თავად მეუფე შიომ პატრიარქად გამორჩევის შემდეგ წარმოთქმულ სიტყვაში განაცხადა. მისი განმარტებით, ტრადიციის მიხედვით, პატრიარქის გამორჩევის შემდეგ პირველივე კვირას უკვე უნდა იმსახუროს კათოლიკოს-პატრიარქმა და რადგან ასეთი დღესასწაული 12 მაისს არის (წმინდა მოციქულ ანდრია პირველწოდებულის საქართველოში შემოსვლის და საქართველოს ყოვლადწმინდა ღვთისმშობლისადმი წილხვდომილობის დღესასწაული), ინტრონიზაციაც ხვალ გაიმართება.

შიო III-მ ამ სიტყვაში მადლობა გადაუხადა მღვდელმთავრებს, ღვთისმშობელს, ღირს მამა შიომღვიმელს და სენაკისა და ჩხოროწყუს ეპარქიის მფარველს, წმინდა ღირს ალექსი სენაკელს. მან ასევე აღნიშნა, რომ გაცნობიერებული აქვს, "ერთი მხრივ, ამ მოწოდების სიდიადე და პატივი და მეორე მხრივ მისი ადამიანური სიძლიერე და უძლურება".

"მღვდელმთავარნო, პატიოსანო მამანო, დედანო, ძმანო და დანო. ძნელია ჩემთვის ამ წუთებში გამოვხატო თქვენს წინაშე ჩემი სულიერი განწყობა, იმედი, განცდა, რაც თან ახლავს იმ არჩევანს, რომელმაც წილად მარგუნა დიდი პატივიც და მძიმე ჯვარიც. უპირველესად მადლობას ვწირავ მაღალ ღმერთს ამ დიდი წყალობისთვის, რომელიც მოიღო ჩემზე, მადლობა ყოვლადწმინდა ღვთისმშობელს. მართლმადიდებელი ეკლესიის წმინდანთა დასს. ღირს მამა შიო მღვიმელს. სენაკისა და ჩხოროწყუს ეპარქიის მფარველს, წმინდა ღირს ალექსი სენაკელს (შუშანიას)...

მადლობა საქართველოს მართლმადიდებელი ეკლესიის წმინდა სინოდის მღვდელმთავრებს ჩემდამი გამოჩენილი ესოდენ დიდი ნდობისთვის. თითოეულ ადამიანს, ვინც დაუღალავად იღვაწა დღევანდელი კრების ღირსეულად წარმართისთვის; კრების ყველა დელეგატს. განსაკუთრებული მადლობა ქართველ ხალხს სიყვარულისთვის, ლოცვისა და თანადგომისთვის. ასევე მინდა მადლობა გადავუხადო სენაკისა და ჩხოროწყუს ეპარქიის სამღვდელოებას და მრევლს გამოვლენილი სიყვარულისთვის და მათთან ერთად ღვთისა და ეკლესიის სამსახურში გატარებული წლებისთვის. დიდი მადლია და წყალობა ღვთისა და ამავდროულად მძიმეა თანმდევი ჯვარი და პასუხისმგებლობა. შეუძლებელია უფლის განგების და განზრახვის ამოცნობა და პასუხის მოძიება კითხვაზე თუ, რატომ ინება ღმერთმა ასეთი დიდი მადლის და მსახურების მოცემა და დაკისრება ჩემზე. გაცნობიერებული მაქვს ერთი მხრივ, ამ მოწოდების სიდიადე და პატივი და, მეორე მხრივ, ჩემი ადამიანური სიძლიერე და უძლურება...

გთხოვთ, ილოცოთ ჩემთვის. ილოცეთ ჩვენი ეკლესიის მომავლისთვის, რათა ერთობით, სიყვარულით და მშვიდობით ვადიდოთ უფალი და ღირსეულად გავაგრძელოთ ჩვენი მსახურება ეკლესიისა და ერის საკეთილდღეოდ. მოგეხსენებათ, დღეს ჩვენ უნდა გამოვაცხადოთ ინტრონიზაციის თარიღი. ტრადიციის მიხედვით, გამორჩევის შემდეგ პირველივე კვირას თუ დიდ დღესასწაულზე უკვე უნდა იმსახუროს კათოლიკოს-პატრიარქმა, ამიტომ ჩვენ გადავწყვიტეთ, რომ უახლოესი ასეთი დღესასწაული გახლავთ ხვალ. ეს არის წმინდა მოციქულ ანდრია პირველწოდებულის საქართველოში შემოსვლის და საქართველოს ყოვლადწმინდა ღვთისმშობლისადმი წილხვდომილობის დღესასწაული. ამიტომ ინტრონიზაცია შედგება ხვალ, სვეტიცხოველში. მსახურება დაიწყება დილის 10 საათზე", — განაცხადა შიო III-მ.

შეგახსენებთ, საქართველოს 142-ე კათოლიკოს-პატრიარქი სენაკისა და ჩხოროწყუს მიტროპოლიტი, საპატრიარქო ტახტის მოსაყდრე შიო მუჯირი გახდა. დღეიდან ასე იწოდება, როგორც მცხეთა-თბილისის მთავარეპისკოპოსი, ბიჭვინთის და ცხუმ აფხაზეთის მიტროპოლიტი და სრულიად საქართველოს კათოლიკოს-პატრიარქი შიო III.

ტახტის მოსაყდრემ კენჭისყრაზე 39 ხმიდან 22 ხმა მიიღო. დანარჩენი ორი კანდიდატიდან, მროველ-ურბნელმა მიტროპოლიტმა იობ აქიაშვილმა მიიღო 9 ხმა, ფოთისა და ხობის მიტროპოლიტმა გრიგოლ ბერბიჭაშვილმა 7 ხნა, 1 ხმა გაუქმდა.