სერბეთის უმაღლესმა სამხედრო ხელმძღვანელობამ განაცხადა, რომ უნგრეთის საზღვართან მდებარე გაზსადენთან ასაფეთქებელი ნივთიერებების აღმოჩენის უკან უკრაინა არ დგას. ეს განცხადება უნგრეთის პრემიერვინისტრ ვიქტორ ორბანისთვის, რომელიც კიევის ჩართულობაზე მკაფიოდ მიანიშნებდა, ერთგვარი პასუხია. ამის შესახებ ინფორმაციას POLITICO ავრცელებს.

POLITICO-ს ცნობით, სერბეთის პრეზიდენტმა, ალექსანდარ ვუჩიჩმა — რომელიც ორბანის ახლო მოკავშირეა — კვირას განაცხადა, რომ სამართალდამცავებმა "დამანგრეველი ძალის ასაფეთქებელი მოწყობილობა" აღმოაჩინეს იმ გაზსადენის სიახლოვეს, რომლითაც რუსული გაზი მეზობელ უნგრეთს მიეწოდება. ეს ფაქტი 12 აპრილს დაგეგმილ უნგრეთის საყოველთაო არჩევნებამდე ერთი კვირით ადრე მოხდა.

ორბანმა ეროვნული თავდაცვის საბჭოს საგანგებო სხდომის შემდეგ განაცხადა, რომ სერბეთის ხელისუფლებამ ვოევოდინაში "საბოტაჟის ოპერაცია" გამოავლინა. მან ეს ფაქტი ირიბად უკრაინას დაუკავშირა და აღნიშნა, რომ კიევი "წლებია ევროპისთვის რუსული ენერგიის მიღების გზების გადაკეტვაზე მუშაობს" და "პირდაპირ საფრთხეს უქმნის უნგრეთს".

POLITICO წერს, რომ ბელგრადის სამხედრო უსაფრთხოების სააგენტოს (VBA) დირექტორმა, ჯურო იოვანიჩმა 5 აპრილს, საღამოს განაცხადა, რომ ინფორმაცია "თითქოს უკრაინელები ცდილობდნენ ამ შეთქმულების ორგანიზებას" სიმართლეს არ შეესაბამება. მისი თქმით, ნაპოვნი იყო ჰერმეტულად დალუქული ასაფეთქებელი ნივთიერება დეტონატორებით.

"ასაფეთქებელი ნივთიერების მწარმოებელი, არ ნიშნავს, რომ ის არის მისი დამკვეთი ან შემსრულებელი", — დასძინა მან და აღნიშნა, რომ მარკირების მიხედვით, ასაფეთქებელი ნივთიერება აშშ-შია დამზადებული.

ორბანის განცხადებებს საბოტაჟის შესახებ სკეპტიკურად შეხვდა მისი მთავარი ოპონენტი მომავალ არჩევნებში, პეტერ მადიარი. მადიარმა აღნიშნა, რომ ორბანი, რომელმაც ენერგოუსაფრთხოება და კიევთან დაპირისპირება თავისი კამპანიის ქვაკუთხედად აქცია, შესაძლოა სერბი და რუსი აქტორების დახმარებით, თავად ახორციელებდეს "ცრუ დროშის" ოპერაციას რადგან მისი პარტიის, რეიტინგი ეცემა.

"თუ ვიქტორ ორბანი და მისი პროპაგანდა ამ პროვოკაციას საარჩევნო მიზნებისთვის გამოიყენებენ, ეს იქნება იმის ღია აღიარება, რომ საქმე გვაქვს წინასწარ დაგეგმილ ცრუ ოპერაციასთან", — თქვა მადიარმა.

POLITICO წერს, რომ უკრაინის საგარეო საქმეთა სამინისტროს პრესსპიკერმა კატეგორიულად უარყო ყოველგვარი პასუხისმგებლობა და დაგმო მცდელობები უკრაინის ამ საკითხთან დაკავშირების შესახებ. მან აღნიშნა, რომ ეს ინციდენტი, სავარაუდოდ, რუსული ოპერაციაა არჩევნების წინ.