"აშშ ამ პროცესში [უკრაინის ომში] არასდროს უნდა ჩარეულიყო", — ამის შესახებ აშშ-ის პრეზიდენტმა, დონალდ ტრამპმა თეთრ სახლში ჟურნალისტებთან საუბრისას განაცხადა და ხაზი გაუსვა უზარმაზარ ფინანსურ ხარჯებსა და ამერიკული არსენალის გამოფიტვას. მისივე თქმით, უკრაინული მხარისთვის იარაღის გადაჭარბებული მიწოდების გამო, ამერიკული მარაგები კრიტიკულად გამოიფიტა.

უკრაინული მედია წერს, რომ დონალდ ტრამპმა წინა ადმინისტრაცია უკრაინისთვის 350 მილიარდი დოლარის გამოყოფის გამო გააკრიტიკა, რადგან აშშ-ს არავითარი ეროვნული სარგებელი არ მიუღია და განაცხადა, რომ აშშ ახლა მხოლოდ საბრძოლო მასალას ყიდის, რაშიც ევროკავშირი იხდის ფულს.

ჟურნალისტებთან საუბრისას დონალდ ტრამპმა უკმაყოფილება გამოთქვა იმ მხარდაჭერის მასშტაბების გამო, რომელსაც აშშ მანამდე უწევდა უკრაინას და ეჭვქვეშ დააყენა ოკეანის მიღმა მდებარე ქვეყნის საქმეებში ვაშინგტონის ღრმა ჩართულობის მიზანშეწონილობა.