"ჩვენ შევთავაზეთ [რუსეთს] ცეცხლის შეწყვეტა აღდგომის დღესასწაულისთვის — საპასუხოდ კი "შაჰედებს" ვიღებთ. ჩვენ ასევე შევთავაზეთ ცეცხლის შეწყვეტა ენერგეტიკულ ინფრასტრუქტურაზე — რუსები ამას უგულებელყოფენ და კიდევ ერთხელ ცდილობენ დაარტყან ჩვენს სადგურებსა და ტრანსფორმატორებს — წერს ვოლოდიმირ ზელენსკი X-ზე

"ლუცკში რუსული "შაჰედების" ღამის თავდასხმის შემდეგ ხანძრის ქრობის სამუშაოები მიმდინარეობს. დარტყმები განხორციელდა წმინდად სამოქალაქო ობიექტებზე — პროდუქტების საწყობებსა და „ნოვა პოშტას“ ტერმინალზე. ასევე დაზიანდა საცხოვრებელი კორპუსი. უკრაინის საგანგებო სიტუაციების სახელმწიფო სამსახურის ყველა საჭირო ქვედანაყოფი და მუნიციპალური სამსახურები უკვე მობილიზებულია თავდასხმის შედეგების სალიკვიდაციოდ. ღამის განმავლობაში რუსული თავდასხმების ქვეშ მოჰყვა ასევე დნიპროპეტროვსკის, ჟიტომირის, პოლტავის, ოდესის, ხარკოვისა და ხმელნიცკის ოლქები. ჩვენს ცაზე კვლავ არიან "შაჰედები". საერთო ჯამში, ღამის განმავლობაში რუსეთმა უკრაინის წინააღმდეგ 339 დრონი გამოიყენა, მათგან დაახლოებით 200 "შაჰედი" იყო.

დატვირთული დიპლომატიური დღე იქნება — უკვე დაგეგმილია მრავალი კონტაქტი, ეს ღამის თავდასხმა კი, ფაქტობრივად, რუსეთის პასუხია დიპლომატიურ ძალისხმევაზე. ჩვენ შევთავაზეთ ცეცხლის შეწყვეტა აღდგომის დღესასწაულისთვის — საპასუხოდ კი "შაჰედებს" ვიღებთ. ჩვენ ასევე შევთავაზეთ ცეცხლის შეწყვეტა კონკრეტულად ენერგეტიკულ ინფრასტრუქტურაზე — რუსები ამას უგულებელყოფენ და კიდევ ერთხელ ცდილობენ დაარტყან ჩვენს სადგურებსა და ტრანსფორმატორებს. უკრაინა მუშაობს პარტნიორებთან ერთად სიცოცხლის დასაცავად, მაშინ როცა რუსეთი ახანგრძლივებს ომს ევროპაში და ირანის რეჟიმს სადაზვერვო ინფორმაციას უზიარებს და ღიად აბანდებს რესურსებს ახლო აღმოსავლეთსა და ყურეში ომის გასაღვივებლად.

რუსეთი გლობალური საფრთხეა და სიცოცხლისა და მშვიდობის მიმართ მისი უპატივცემულობაა ის, რაც ნებისმიერ დიპლომატიას აფერხებს. მადლობელი ვარ ყველასი, ვინც მხარს უჭერს ჩვენს ძალისხმევას სიცოცხლის დასაცავად და ყველასი, ვინც უზრუნველყოფს რუსეთის წინააღმდეგ სანქციების აღსრულებას ამ ომის გამო. რაც უფრო მაღალი იქნება რუსული დრონებისა და რაკეტების განადგურების მაჩვენებელი და რაც უფრო მაღალი იქნება რუსულ ნავთობზე, ვაჭრობასა და წარმოებაზე შეზღუდვების პროცენტი, მით უფრო მალე იქნება უზრუნველყოფილი უსაფრთხოება და დამყარებული მშვიდობა" — ვკითხულობთ ზელენსკის წერილში.