წელს ამერიკელმა მსახიობმა და რეჟისორმა შონ პენმა ოსკარის დაჯილდოების 98-ე ცერემონია გამოტოვა და მესამე ოქროს ქანდაკება პირადად ვერ მიიღო. ოსკარის ცერემონიაზე დასწრებას პენმა უკრაინაში სტუმრობა არჩია. ამ ჟესტმა უკრაინელები, განსაკუთრებით "უკრზალიზნიცა", ძალიან გააოცა და მისმა აღმასრულებელმა დირექტორმა, ალექსანდრ პეცოვსკიმ ჰოლივუდის ვარსკვლავს "რკინის ოსკარი" გადასცა.

კომპანიამ თავის ინსტაგრამის გვერდზე განმარტა, რომ შონ პენს ოსკარის გარეშე ვერ დატოვებდნენ, ამიტომ მას რკინის ქანდაკება გადასცეს, რომელიც რუსეთის თავდასხმის დროს დაზიანებული მატარებლის ვაგონის ფოლადისგანაა დამზადებული. მიუხედავად იმისა რომ ჯილდო ოქროსფერი არ არის, "უკრზალიზნიცამ" მის განსაკუთრებულ ღირებულებასა და სიმბოლიკას გაუსვა ხაზი.

"თქვენ ოსკარის ცერემონია გამოტოვეთ და პრეზიდენტს ბოლო ქანდაკებაც გადაეცით. სწორედ ამიტომ დავამზადეთ ეს ჯილდო რუსების მიერ დაზიანებული მატარებლის ვაგონისგან. თქვენ თქვით, რომ ლითონი გადარჩა, ამიტომ აქ რამდენიმე სიტყვა ამოტვიფრეთ, რომელიც ჩვენთვის მნიშვნელოვანია", — განაცხადა "უკრზალიზნიცის" საბჭოს თავმჯდომარემ, ალექსანდრ პეცოვსკიმ, მსახიობისთვის საჩუქრის გადაცემამდე.

ქანდაკებაზე შემდეგი სიტყვებია ამოტვიფრული:

"ამ ფოლადმა ოდესღაც მილიონობით ადამიანი ომს განარიდა. შემდეგ რუსული რაკეტა ჩამოვიდა. ჩვენ ის იარაღის დასამზადებლად არ გადავადნეთ, ხელახლა გამოვჭედეთ მადლიერების ნიშნად თქვენთვის. თქვენი ნიჭისთვის, უკრაინის გვერდით დგომის გამბედაობისთვის".

უკრაინული მედია წერს, რომ შონ პენი სრულიად გაოცებული იყო ასეთი საჩუქრით და ალექსანდრ პეცოვსკის "ნამდვილი საგანძურისთვის" მადლობა გადაუხადა.