ჯეიმს ჰეტფილდი ოჯახურ ცხოვრებაში "ჩაყვინთვას" აპირებს. მეტალიკას ფრონტმენმა თავის პარტნიორ ადრიანა ჟილეტთან ნიშნობის შესახებ გამოაცხადა. მან საყვარელ ადამიანს ხელი წყალქვეშ სთხოვა, როდესაც წყვილი ვეშაპისებრ ზვიგენებთან ერთად ცურავდა.

ჰეტფილდმა ეს ამბავი მეტალიკას ინსტაგრამის ანგარიშზე გაამხილა და გააზიარა ფოტო, სადაც წყვილი ერთმანეთის გვერდით ტივტივებს, ჰეტფილდს კი ხელში უჭირავს ხელნაწერი პლაკატი წარწერით: "ადრიანა ჟილეტ, ცოლად გამომყვები?"

მოგვიანებით ჟილეტმა თავად გააზიარა ეს მომენტი და გაამხილა, რომ ფაქტი დაბადების დღეზე მოგზაურობისას მოხდა და გაცილებით უფრო დასამახსოვრებელი აღმოჩნდა. "დაბადების დღის საუკეთესო სიურპრიზი. ვეშაპისებრ ზვიგენებთან ერთად ცურვა პარასკევს, 13 რიცხვში, ყველაზე უნიკალური, განსაკუთრებული და რომანტიკული წინადადებით, რაც კი თევზებს (ზოდიაქოს ნიშანს) შეიძლება წარმოედგინა", — წერს ის — "თევზებით სავსე ზღვაში ჩვენ ერთმანეთი ვიპოვეთ. მადლობა ღმერთს, რომ ჩვენ ერთმანეთს შეგვახვედრა".

ვეშაპისებრი ზვიგენები, რომლებიც 18 მეტრამდე იზრდებიან, პლანეტის ყველაზე დიდი ცნობილი თევზის სახეობაა, მათი გლობალური პოპულაცია დაახლოებით 130 000-დან 200 000-მდეა.

ფრანჩესკა ტომასთან 25-წლიანი ქორწინების შემდეგ, 2022 წელს განქორწინებიდან ეს ნიშნობა ჰეტფილდისთვის ცხოვრების ახალი თავია, ყოფილ წყვილს სამი შვილი ჰყავს. ჰეტფილდი და ჟილეტი ერთმანეთს 2023 წლიდან ხვდებიან.