ქუთაისის სასამართლომ სამსახურებრივი უფლებამოსილების ბოროტად გამოყენების ფაქტზე დაკავებულ ლენტეხის ყოფილ მერს, გია ონიანს 18 000 ლარის ოდენობის გირაო შეუფარდა. ამის შესახებ ინფორმაციას მისი ადვოკატი, ლევან მახარაშვილი ავრცელებს.

ასევე გირაოთი გაათავისუფლეს ონიანთან ერთად დაკავებული არქიტექტურის და ზედამხედველობის სამსახურების ხელმძღვანელები, გიორგი გულბანი და ნუგზარ ტვილდიანი. გულბანს გირაოს ოდენობად 13000 კარი განესაზღვრა, ხოლო ტვილდიანს —12000.

ადვოკატის განცხადებით, დაკავებულები საპატიმრო დაწესებულებას მას შემდეგ დატოვებენ, რაც ოჯახი გირაოს თანხას სრულად გადაიხდის.

შეგახსენებთ, დასავლეთ საქართველოს საოლქო პროკურატურის თანამშრომლებმა, სამსახურებრივი უფლებამოსილების ბოროტად გამოყენების ფაქტზე, ლენტეხის მუნიციპალიტეტის ყოფილი მერი — გია ონიანი, არქიტექტურის და ზედამხედველობის სამსახურების ხელმძღვანელები — ნუგზარ ტვილდიანი და გიორგი გულბანი დააკავეს. ამის შესახებ ინფორმაცია პროკურატურამ გაავრცელა. მათი განმარტებით, გია ონიანმა, ლენტეხის მუნიციპალიტეტის მერად არჩევის შემდეგ, სასტუმროს აშენების მიზნით, შეიძინა მიწის ნაკვეთი და დაუკვეთა მშენებლობის პროექტი, რომელიც ვერ პასუხობდა სამშენებლო ნორმების მოთხოვნებს. გია ონიანმა მეუღლის სახელზე რეგისტრირებული კომპანიის მეშვეობით აღნიშნული პროექტი წარადგინა ლენტეხის მუნიციპალიტეტის მერიის არქიტექტურის სამსახურში, რომელსაც ნუგზარ ტვილდიანი ხელმძღვანელობდა. ნებართვის გაცემის პროცესში, გია ონიანმა და ნუგზარ ტვილდიანმა ბოროტად გამოიყენეს სამსახურებრივი უფლებამოსილება.

როგორც უწყება წერს, სასტუმროს მშენებლობის პროცესში, ზედამხედველობის სამსახურმა, რომელსაც გია ონიანის მეუღლის დის ქმარი გიორგი გულბანი ხელმძღვანელობდა, ნაცვლად იმისა, რომ შეეჩერებინა კანონის მოთხოვნათა დარღვევით ნაწარმოები მშენებლობა, გია ონიანს საშუალება მისცა გაეგრძელებინა უკანონო მშენებლობა.

პროკურატურის განმარტებით, ბრალდებულთა აღნიშნული ქმედებით, არსებითად დაირღვა სახელმწიფოს კანონიერი ინტერესი.