ნიდერლანდების დელფტის უნივერსიტეტის ორი ინჟინერი ათწლეულების წინ შექმნილ სპეკულუმის (გინეკოლოგიური სარკე) დიზაინს თავიდან ქმნის, რათა იგი პაციენტებისთვის ნაკლებად მტკივნეული და საშიში გახდეს. სპეკულუმი ქალთა გინეკოლოგიურ გამოკვლევებში გამოიყენება.

ვაგინალური სპეკულუმი, რომელსაც ქალები მთელ მსოფლიოში ყოველდღიურად იყენებენ გინეკოლოგიური გამოკვლევების დროს, აუცილებელი ინსტრუმენტია, თუმცა პაციენტებისთვის ის ხშირად მტკივნეულად, ცივად და უსიამოვნოდ აღიქმება.

ფოტო: Getty Images

კუსკოს სპეკულუმი, ყველაზე ფართოდ გამოყენებული მოდელი, მეტალის ინსტრუმენტია, სახელურით, "ნისკარტის" ფორმის ნაწილითა და ხრახნით, რომელიც ვაგინაში გახსნის სიგანეს არეგულირებს. სპეკულუმის ბნელმა ისტორიამ (ის 180 წლის წინ ამერიკელმა ექიმმა შექმნა და მონობაში მყოფ ქალებზე გამოცადა) მკვლევარ თამარა ჰოველინგს უბიძგა, ინსტრუმენტი თავიდან დაეპროექტებინა.

ჰოველინგმა და არიადნა ისკარა გუალმა პროექტზე ერთად იმუშავეს. გუალმა აღნიშნა, რომ მაშინაც კი, როცა ის მსგავსი ფორმის ესკიზებს ხატავდა, ადამიანები "მაინც შიშით უყურებდნენ ამ მოწყობილობას".

ჰოველინგმა AFP-ს უთხრა, რომ ის "ცდილობდა ისეთი ფორმები ეპოვა, რომლებიც რეპროდუქციულ ორგანოებთან იქნებოდა ასოცირებული, მაგალითად, ყვავილი, რომელიც ასევე იხსნება".

პროტოტიპს ლილიუმი ეწოდა, შროშანის სახელის მიხედვით. ეს არის რბილი, პლასტმასის სპეკულუმი აპლიკატორით, უხმაურო, სამმხრივად გახსნადი კონსტრუქციით, რაც გამოკვლევის დროს უკეთეს ხილვადობას უზრუნველყოფს და ხელს უშლის ვაგინალური კედლების ჩაკეცვას.

პროექტის დაფინანსება ინჟინრებმა ხალხისგან შეგროვებული თანხით მოახერხეს და მხოლოდ ორ დღეში 100 000 ევრო შეაგროვეს, რამაც მოლოდინს გადააჭარბა. "ეს იმის დასტურია, რომ ნამდვილად ბევრს სურს ცვლილება, აქ რეალური პრობლემა არსებობს და ბაზარზე არსებული გადაწყვეტები საუკეთესო არ არის", — თქვა ჰოველინგმა.

მისივე თქმით, მან უამრავი ქალის წერილი მიიღო, რომლებიც წერდნენ, რომ "ამ მოწყობილობის გამო გინეკოლოგთან საერთოდ არ მიდიან, იმიტომ, რომ ეშინიათ და იმიტომ, რომ ტრავმული გამოცდილება აქვთ".

ონლაინ სივრცეში ქალებმა სიახლე სიხარულით მიიღეს. ერთმა ინსტაგრამზე დაწერა: "დაპროექტებულია ქალის მიერ, რომელმაც თავად იწვნია ის ტკივილი, რასაც კაცის მიერ შექმნილი სპეკულუმი იწვევს".

სხვა წერდა: "ჩემი ცხოვრების განმავლობაში პირველად გინეკოლოგმა 'პლასტმასის' (როგორც ჩანს) სპეკულუმი გამოიყენა. აქამდე ასეთი არაფერი მინახავს. გამჭვირვალე და გლუვი ზედაპირებით. ბევრად უკეთესია", ხოლო მესამე ქალმა უბრალოდ დაწერა: "მადლობა!"

ჯანდაცვის მსოფლიო ორგანიზაციის მონაცემებით, საშვილოსნოს ყელის კიბო ქალებში გავრცელებით მეოთხე ადგილზეა. მისი გამოვლენა შესაძლებელია პაპ-ტესტის ან HPV-ს სკრინინგის მეშვეობით, ეს ორივე პროცედურა სპეკულუმის გამოყენებით ტარდება.

ასევე ნახეთ: