რუსეთის პრეზიდენტი ვლადიმერ პუტინი ორდღიანი ვიზიტით ინდოეთში მიემგზავრება, რომლის დროსაც ის პრემიერმინისტრ ნარენდრა მოდისთან ორმხრივ ურთიერთობებსა და საერთაშორისო ურთიერთობებს განიხილავს. ამის შესახებ რუსული მედია წერს.

მათი ცნობით, პუტინის ვიზიტი მოდისთან არაფორმალური შეხვედრით დაიწყება. შეხვედრა 4 დეკემბერს, კერძო და პირისპირ ფორმატში გაიმართება. რუსეთის პრეზიდენტის საერთაშორისო ურთიერთობების თანაშემწის, იური უშაკოვის თქმით, ეს შეხვედრა ინდოეთში ვიზიტის ერთ-ერთი მთავარი მოვლენა იქნება. პუტინს და მოდის პირისპირ შეეძლებათ ორმხრივი ურთიერთობების ყველაზე მგრძნობიარე და მნიშვნელოვანი საკითხების და საერთაშორისო დღის წესრიგის განხილვა.

მეორე დღეს, 5 დეკემბერს, ნიუ-დელიში გაიმართება რუსეთ-ინდოეთის ოფიციალური მაღალი დონის მოლაპარაკებები.

გარდა ამისა, პარასკევს, პუტინი და მოდი მონაწილეობას მიიღებენ რუსეთ-ინდოეთის ბიზნეს ფორუმის პლენარულ სესიაში. განიხილება ორ ქვეყანას შორის სავაჭრო-ეკონომიკური ურთიერთობების შემდგომი განვითარება. იმავე დღეს, რუსეთის პრეზიდენტი ცალკე შეხვედრას გამართავს ინდოეთის პრეზიდენტ დრაუპადი მურმუსთან. პუტინი ვიზიტის მეორე დღეს ასევე ეწვევა მაჰათმა განდის მემორიალს.

რუსული მედია წერს, რომ ვიზიტის ფარგლებში იგეგმება რუსეთ-ინდოეთის ეკონომიკური თანამშრომლობის 2030 წლამდე განვითარების პროგრამის დამტკიცება. მხარეები ასევე ხელს მოაწერენ ორმხრივი სააგენტოთაშორისი და კომერციული დოკუმენტების პაკეტს.