ყაზახეთის საგარეო საქმეთა სამინისტრომ "კრიტიკული ინფრასტრუქტურის წინააღმდეგ მიმართულ კიდევ ერთ მიზანმიმართულ შეტევა" გააპროტესტა, რომელიც საერთაშორისო კასპიის მილსადენის კონსორციუმის (CPC) ობიექტებზე ნოვოროსიისკის პორტის აკვატორიაში განხორციელდა. 30 ნოემბერს, კვირას გავრცელებულ განცხადებაში სამინისტრო აღნიშნავს, რომ ეს ინციდენტი "მესამე აქტი იყო აგრესიისა სრულიად სამოქალაქო ობიექტის წინააღმდეგ, რომლის მუშაობაც საერთაშორისო სამართლითაა გარანტირებული". ამის შესახებ ინფორმაციას Deutsche Welle ავრცელებს.

საგარეო სამინისტროს სპიკერმა აიბეკ სმადიაროვმა ხაზი გაუსვა CPC-ის მნიშვნელოვან როლს გლობალური ენერგოსისტემის სტაბილურობის შენარჩუნებაში და კიდევ ერთხელ დაადასტურა ყაზახეთის, როგორც "გლობალური ენერგომარკეტის პასუხისმგებელი მონაწილის" მზადყოფნა, შეუფერხებელი ენერგომომარაგების უზრუნველყოფისთვის. სამინისტროს შეფასებით, ინციდენტი "აზიანებს ყაზახეთის რესპუბლიკასა და უკრაინას შორის ორმხრივ ურთიერთობებს" და იმედოვნებენ, რომ უკრაინის მხარე " მსგავსი შემთხვევების თავიდან ასაცილებლად მომავალში ეფექტურ ზომებს მიიღებს".

ცნობისთვის, 29 ნოემბრის დილით კასპიის მილსადენის კონსორციუმის (CPC) საზღვაო ტერმინალმა, რომლის მეშვეობითაც ყაზახეთს ნავთობს ევროპასა და შეერთებულ შტატებში გააქვს, უკრაინული უპილოტო ნავების თავდასხმის შემდეგ ნავთობის გატანა შეწყვიტა.

თავდასხმის შემდეგ ყაზახეთის ენერგეტიკის სამინისტრომ ნავთობის ექსპორტის ალტერნატიულ მარშრუტებზე გადამისამართება დაიწყო. უკრაინას ამ თავდასხმაში მონაწილეობა არ დაუდასტურებია.