ოცნების პარლამენტის თავმჯდომარე შალვა პაპუაშვილი ქართული ოცნების საკანონმდებლო ინიციატივას ეხმაურება, რომლის მიხედვითაც ემიგრანტებს საზღვარგარეთ არჩევნებში მონაწილეობა ეკრძალებათ. მისი თქმით, საკანონმდებლო ცვლილებები ემსახურება დიასპორის უფლებების დაცვას და მათგან წნეხის მოხსნას, რათა ისინი არ გამოიყენონ საკუთარი ქვეყნის წინააღმდეგ იარაღად

"ჩვენ ვთქვით კიდეც, რომ სულ უფრო იმატებს მსოფლიოში სხვა ქვეყნების არჩევნებში ჩარევის ფაქტები. ამაზე საუბრობენ აშშ-შიც, ევროკავშირის სხვადასხვა ქვეყანაშიც, რომ ერევიან მათ არჩევნებში.ეს ვნახეთ 2024 წელს, როდესაც ჩვენს არჩევნებში უხეშად ჩაერივნენ ევროკავშირის ქვეყნების წარმომადგენლები, რათა დაედოთ მათთვის სასურველი საარჩევნო შედეგი. არაფერს მოერიდნენ. მათ შორის ევროკავშირის ელჩი პირდაპირ ჩაერთო ქართული ოცნების წინააღმდეგ კამპანიაში. აქ მიტინგებს მართავდნენ უცხო ქვეყნების მინისტრები. ჩვენ როგორ ვანდოთ, რომ მათ ქვეყნებში ჩვენს მოქალაქეებზე არ იქნება ზეწოლა და მათი გავლენა, რათა სასურველი საარჩევნო შედეგი დაიდოს? რაც მთავარია, ამის ფაქტები არის.

[…[ წნეხის გამოსარიცხად შემოგვაქვს წესი. ეს წესი მოქმედებს ზუსტად იმ ქვეყნებში, რომლებსაც ჰყავთ ძლიერი დიასპორა – სომხეთი, ისრაელი, ირლანდია, მალტა, ზუსტად ის ქვეყნებია, რომელთა დიასპორასაც ამ ქვეყნების განვითარებაში დიდი წვლილიც შეაქვს. კონტაქტსაც არ კარგავენ, მაგრამ ზუსტად ასე იცავს სომხეთი, ირლანდიაც, ისრაელიც თავისი დიასპორის წარმომადგენლებს საზღვარგარეთ. იცავს, რათა ისინი არ გამოიყენონ საკუთარი ქვეყნის წინააღმდეგ იარაღად და უცხო ძალებმა არ ჩართონ პოლიტიკურ დღის წესრიგში. ეს ცვლილებები ემსახურება, მათ შორის, დიასპორის უფლებების დაცვას და მათგან წნეხის მოხსნას", — განაცხადა შალვა პაპუაშვილმა ჟურნალისტებთან საუბრისას.