"ჯარიმის გადასახდელად თანხას, რომ რიცხავდა მოქალაქე და დანიშნულებაში ჩაწერა: "გავიმარჯვებთ სახელოვნად", ამასთან დაკავშირებით მომიწია განმარტება" — ამის შესახებ "ადამიანის უფლებათა ცენტრის" აღმასრულებელმა დირექტორმა, ალეკო ცქიტიშვილმა ე.წ. პირბადეების საქმეზე თბილისის საქალაქო სასამართლოში გამოკითხვის დასრულების შემდეგ ჟურნალისტებს განუცხადა.

მისი თქმით, პროკურატურას კითხვები გადარიცხვებთან დაკავშირებით ჰქონდა.

"ძირითადად ამ საკითხებს შეეხებოდა — დონორები ვინ გყავთ, თანხას, როგორ რიცხავენ, ჯარიმების თანხას რატომ იხდიდით და ამ კითხვებზე ვუპასუხე. ჯარიმის გადასახდელად თანხას, რომ რიცხავდა მოქალაქე და დანიშნულებაში ჩაწერა: "გავიმარჯვებთ სახელოვნად", ამასთან დაკავშირებით მომიწია განმარტება, რომ მასთან დაკავშირებით რაიმე კრიმინალის შემცველი ამ დანიშნულების სიტყვებში არ ყოფილა და მარო მაყაშვილის სიტყვებია. ეს არის რუსეთის სცენარით დაწერილი პროცესი და ამ პროცესის შემადგენელი ნაწილია როგორც გამოძიება, ისე ყოველი სხდომა, ჩვენი დაბარებები. მზიანი არის არასამთავრობო ორგანიზაციების გაუქმება," — განაცხადა ალეკო ცქიტიშვილმა.

პროცესის დასრულების შემდეგ ადვოკატმა ნესტან ლონდარიძემ სხდომის დეტალებზე ისაუბრა.

"ყველაზე მთავარი, რაზეც მე გავამახვილებდი ყურადღებას ეს არის ის დამოკიდებულება, რასაც იჩენდნენ ორგანიზაციის წარმომადგენლების მიმართ. აგრესიული ტონი, კითხვები რაც ისმებოდა, ჩემთვის ნამდვილად შემაშფოთებელი იყო, თუ როგორ კონტროლდება ყველა ჩვენი Facebook პოსტები, კონტროლდება ყველა ჩვენი გამოთქმული მოსაზრება და ცდილობენ ამ მოსაზრების უკან მოიაზრონ პოლიტიკური განცხადებები,"— განაცხადა ადვოკატმა.

სხდომის დასრულების შემდეგ კომენტარი გააკეთა პროკურორმა ლაშა კოტრიკაძემაც, რომელსაც გადასახადის დანიშნულებამ კითხვები გაუჩინა:

"ერთ-ერთი არასამთავრობო ორგანიზაციის ხელმძღვანელი პირი მის ანგარიშზე რიცხავს თანხებს შემდეგი დანიშნულებით — "სახელოვნად გამარჯვებისთვის", შესაბამისად, ჩვენ გვაინტერესებს, რა თანხებია და ვისზე უნდა გაემარჯვათ", ­— თქვა პროკურორმა.

ალეკო ცქიტიშვილი მაგისტრი მოსამართლის თანდასწრებით იკითხებოდა.

შეგახსენებთ, 9 აპრილს პროკურატურის თანამშრომლები ჩხრეკის ჩასატარებლად შევიდნენ: ნანუკა ჟორჟოლიანის, ალექსანდრე ცქიტიშვილის, ლაშა არველაძის, გუგა ხელაიას და მარიამ გეგუჩაძის სახლებში.

საქართველოს პროკურატურამ სოლიდარობის ფონდების საბანკო ანგარიშები 17 მარტს საზოგადოებრივი მოძრაობა "ერთიანი ნეიტრალური საქართველოს" წარმომადგენლის, ვატო შაქარიშვილის მიერ შეტანილი სარჩელის საფუძველზე დააყადაღა.

ასევე იხილეთ: