ერთიანი ნაციონალური მოძრაობის პოლიტსაბჭოს თავმჯდომარის, ლევან ხაბეიშვილის განცხადებით, არსებობს ეჭვი, რომ აჭარის ავტონომიური რესპუბლიკის მთავრობის ყოფილი მეთაურის, თორნიკე რიჟვაძის დაჭრის დღეს, საგარეჯოს სახლში ოცნების ლიდერი მამუკა მდინარაძე და შსს-ის მინისტრი გეკა გელაძეც იყვნენ. ლევან ხაბეიშვილის განცხადებით, 50 დღის შემდეგაც არავის წარმოუდგენია ექსპერტიზის დასკვნა, "თორნიკე რიჟვაძემ თავად ისროლა, ესროლეს, თუ მაგალითად ზურგიდან ესროლეს".

"ეს კაცი თავისუფალი რატომ დადის? ჩემს სახლში რომ მომხდარიყო მსგავსი რამე, თქვენი აზრით გარეთ ვიქნებოდი?" — განაცხადა ლევან ხაბეიშვილმა ალექსი ახვლედიანთან დაკავშირებით, რომლის სახლშიც და რომლის კუთვნილი იარაღითაც განახორციელა გასროლა, პროკურატურის ვერსიით, აჭარის მთავრობის ყოფილმა მეთაურმა.

"50 დღეზე მეტი გავიდა თორნიკე რიჟვაძის მკვლელობის მცდელობიდან. არსებობს უმნიშვნელოვანესი კითხვები, რაზეც ამ დრომდე არ არსებობს. 50 დღეში არავის არ წარმოუდგენია ექსპერტიზის დასკვნა — თორნიკე რიჟვაძემ თავად ისროლა, ესროლეს თუ ზურგიდან ესროლეს, ამას არ სჭირდება 50 დღე, მაქსიმუმ პირველ 3-5 დღეში აბსოლუტურად თავისუფლად ექსპერტს შეეძლო, პირველადი დასკვნა დაედო და 50 დღეში უკვე სრულყოფილად უნდა არსებობდეს პასუხი, თავად ისროლა, ზურგში ესროლეს თუ როგორ მოხდა და რა ტრაექტორიით მოხდა გასროლა. ამ დრომდე პასუხი არ არსებობს, არავის არ გვინახავს, გარდა კონკრეტული "ქოცების" სპიკერების ბოდვებისა.

მეორე, ვინ იყო ადგილზე მკვლელობის მცდელობის დღეს თორნიკე რიჟვაძესთან საგარეჯოში? ამ დრომდე ოფიციალური ვერსია პროკურატურას არ უთქვამს, ათას სისულელეზე მეტი მოვისმინეთ, მაგრამ 50 დღეზე მეტი გავიდა და ამ დრომდე არ ვიცით იმ დღეს იმ სახლში ვინ იმყოფებოდა, არსებობს ეჭვი იყო თუ არა მამუკა მდინარაძე და გეკა გელაძე შს მინისტრად წოდებული იმ დღეს იმ სახლში. ვიღაცები რომ კომენტარს აკეთებენ, რომ მამუკა მდინარაძე არ იყო, ეგრე არა. ოფიციალური ვერსიით პროკურატურას არ უთქვამს იყო იმ დღეს იმ სახლში თუ არ იყო, არც ე.წ შს მინისტრზე არ უთქვამთ გეკა იყო თუ არა იქ, კომენტარები არ გვაინტერესებს ზარქუა ან ვოლსკი რას იტყვის ან ტროლბოტობას რას დაავალებენ. ჩემს სახლში რომ ყოფილიყო ეს 50 დღეში მეზობლებიდან დაწყებული ყველას გაგაცნობდათ პროკურატურა.

და მესამე, 50 დღეზე მეტი გავიდა და არც ვიდეო ჩანაწერი არ გაუსაჯაროებია
პროკურატურას, არ უჩვენებია რა მანქანებით მივიდნენ, ვინ იყვნენ სახლში, ეს კამერები ხომ არსებობს ამ მდიდარი ადამიანის სახლში.

ეს სამი ძირითადი შეკითხვა გვაქვს გამოძიებასთან და ყველას უნდა ესმოდეს, რომ ვინც ახლა ამ საქმის შეკერვითაა დაკავებული, სისხლის სამართლის დანაშაულს ჩადიხართ. ასევე, ახვლედიანი, რომლის სახლშიც მოხდა და რომლის იარაღითაც მოხდა, ეს კაცი თავისუფალი რატომ დადის? ჩემს სახლში რომ მომხდარიყო მსგავსი რამე, "ქოცმა" მინდა, რომ კარგად გაიგოს, ჩემს სახლში, ჩემი იარაღით მკვლელობის მცდელობა რომ ყოფილიყო თქვენი აზრით გარეთ ვიქნებოდი? ეს კაცი რომ დაბოდიალებს და ამ დრომდე არ ვიცით თვითმკვლელობის მცდელობა იყო თუ რა იყო, არ ვიცი, ექსპერტიზის დასკვნა არ წარმოუდგენია არავის. ეს კაცი, ახვლედიანი თავისუფლად როგორ გადაადგილებდა? კომენტარებს რასაც იძლევა, გვაქვს საფუძვლიანი ეჭვი ვთქვათ, რომ თავისუფლების სანაცვლოდ ლაპარაკობს ეს ადამიანი.

და მეხუთე, ამ 50 დღის განმავლობაში გამოიკითხა თუ არა თავად თორნიკე რიჟვაძე? ახლა არ დაიწყოთ, რომ საავადმყოფოში იყო და რაღაც, ერთი თვეა ეს კაცი აბსოლუტურად თავისუფლად გადაადგილდება, თუ გაინტერესებთ მითხარით და გეტყვით სად შეიძლება მისი ნახვა.

ეს არის ლეგიტიმური შეკითხვები, რომლებიც 50 დღის თავზე აქვს საზოგადოებას, ამიტომ ნება იბოძეთ და პასუხები გაეცით," — განაცხადა ლევან ხაბეიშვილმა.

პროკურატურის ინფორმაციით, 7 ივლისს, თორნიკე რიჟვაძემ საგარეჯოში, საზღვაო ტრანსპორტის სააგენტოს ხელმძღვანელის სახლში, თვითმკვლელობა ალექსი ახვლედიანის კუთვნილი ცეცხლსასროლი იარაღით მიიყენა. გამოძიება სსკ-ის კოდექსით 115-ე მუხლით არის აღძრული, ხოლო ცეცხლსასროლი იარაღის დაუდევრად შენახვისთვის საზღვაო ტრანსპორტის სააგენტოს დირექტორი ალექსი ახვლედიანი სსკ-ის 238-ე მუხლით დააკავეს, მოგვიანებით კი 30 000 ლარიანი გირაოს სანაცვლოდ გაათავისუფლეს.

ასევე იხილეთ: