დღეს, 20 აგვისტოს, აქტივისტი თამარ კურატიშვილი ბათუმის საქალაქო სასამართლოს მოსამართლე მარიანა ფომაევამ აჭარის პოლიციის დეპარტამენტის შესასვლელ ჭიშკარზე მზია ამაღლობელის სტენსილისთვის — "სილა რეჟიმს" 2000 ლარით დააჯარიმა.

შსს-მ სტენსილის ავტორის დასადგენად გარე სათვალთვალო კამერები ამოიღო.

სასამართლოზე თამარ კურატიშვილმა განაცხადა, რომ სტენსილები ნამდვილად მან გააკეთა, თუმცა მოქმედებდა გამოხატვის თავისუფლების ფარგლებში.

"პოლიციის დისკრედიტაცია არ ყოფილა ჩემი მიზანი, არასდროს მიცდია. არ ვეთანხმები ამ ბრალდებას. მეორეც, ვამბობ, რომ ჩემი გაკეთებულია ეს სტენსილები და მე არ უარვყოფ ამას, მაგრამ ეს ჯდება გამოხატვის თავისუფლებაში.

მინდოდა რომ ეს გზავნილი – "სილა რეჟიმს" დარჩენილიყო იმ შენობის ფასადზე, სადაც უსამართლობა მოხდა მზია ამაღლობელის მისამართით.

რაც შეეხება ამ პროცესს, ვფიქრობ, რომ ჩემს მიმართ დაწყებულია დევნა შინაარსის გამო და არა ფორმის. ებრძვიან სტენსილების შინაარსს.

რამდენი სტენსილია ბათუმის ქუჩებში? ქალბატონო მოსამართლევ, საინტერესო იქნება სტატისტიკის ნახვა, განყოფილებებიდან რამდენი მოგმართავთ იმ წარწერების გამო აი, კედლებზე რომ წერია – "გიორგი სად ხარ? "მეტალიკა", "ნათია მიყვარხარ".

როცა კონკრეტული შინაარსი ენიჭება ამ სტენსილებს, მხოლოდ მაშინ იწყება დევნა," – თქვა თამარ კურატიშვილმა სასამართლოზე (კომენტარს ბათუმელები ავრცელებს).